Жиззах вилояти Пахтакор туманида ҳайдовчилик ҳуқуқига эга бўлмай туриб, қўшнисига тегишли транспорт воситасини унинг розилиги билан бошқарган шахсга чора кўрилди. Бу ҳақда ЙҲХХ ахборот хизмати хабар берди.
Қайд этилишича, транспорт воситаси маҳалла профилактика инспектори томонидан аниқланиб, йўл патрул хизмати инспекторига хабар берилган. Ҳайдовчи гумон тариқасида йўл патрул хизмати инспекторига бириктирилган алкотестер ёрдамида текширувдан ўтказилганда, унинг организмида алкоголь мавжудлиги аниқланган.
Шундан сўнг унга нисбатан Маъмурий жавобгарлик тўғрисидаги кодекснинг 131-моддаси (транспорт воситаларини мастлик ҳолатида бошқариш) иккинчи қисмига асосан тегишли тартибда маъмурий баённома расмийлаштирилган.
Ҳолат юзасидан 15 июнь куни жиноят ишлари бўйича Пахтакор тумани судида очиқ суд мажлиси бўлиб ўтган. Суд жараёнида ҳуқуқбузар ўз қилмишидан чин кўнгилдан пушаймон эканини билдириб, келгусида бундай хатога йўл қўймаслигини таъкидлаган ҳамда суддан енгиллик беришини сўраган.
Суд қарори билан айбланувчи Маъмурий жавобгарлик тўғрисидаги кодекснинг 131-моддаси иккинчи қисмида назарда тутилган ҳуқуқбузарлик содир этганликда айбдор деб топилди. Унга нисбатан 15 суткага маъмурий қамоққа олиш жазоси тайинланди.
“Мен алкоголь маҳсулоти истеъмол қилиб автомобил бошқаргандим. Бу ишимдан пушаймонман. Қилмишим 15 сутка қамоқ жазосига олиб келди. Ҳурматли ҳайдовчиларимиздан бу ишни такрорламаслигини илтимос қилиб қоламан”, деди қонунбузар.
