АҚШ 2026 йил бошида Эрон томонидан берилган зарбалар оқибатида зарар кўрган Форс кўрфазидаги айрим ҳарбий базаларини Исроилга кўчиришни режалаштирмоқда. Бу ҳақда Middle East Eye хабар берди.
Маълум қилинишча, Вашингтон Баҳрайндаги базасини қайта жиҳозлаш, Кувайт ва Саудия Арабистонидаги ҳарбий иштирокини эса қисқартиришни кўриб чиқмоқда. Манбаларга кўра, айрим базалар Исроил ҳудудига кўчирилиши мумкин.
Йил бошида, аниқроғи 28 февраль куни АҚШ ва Исроил Эронга ҳужум бошлаган эди. Бунга жавобан Эрон Форс кўрфазидаги объектларга зарбалар берди. АҚШнинг Баҳрайндаги ҳарбий-денгиз базаси февраль охиридан июнгача бир неча бор нишонга олинди. WSJ маълумотларига кўра, штаб-квартира ва яна камида ўнта бино жиддий зарар кўрган. Бироқ Пентагон вайронагарчилик кўламини расман тан олмаган.
Америкаликлар урушга қарши
Айни пайтда АҚШда Эрондаги урушга нисбатан халқнинг муносабати кескин ўзгарган. Бунга АҚШ ва Эрон ўртасида ҳарбий ҳаракатларни 60 кунга тўхтатиб туриш бўйича имзоланган Исломобод меморандуми сабаб бўлди. Ҳозирда томонлар урушни бутунлай тугатиш шартларини муҳокама қилмоқда.
Quinnipiac университети ўтказган сўровномага кўра, 60 фоиз америкалик сайловчилар Эронга қарши ҳарбий ҳаракатларни “бунга арзимас эди” деб ҳисоблайди. 61 фоиз респондентлар Эрон барибир ядро қуролига эга бўлади деган фикрда.
28 февраль куни АҚШ президенти Дональд Трамп ва Исроил бош вазири Биньямин Нетаньяху Эрон хавфини йўқотиш баҳонаси билан уруш бошлаган эди. Уларнинг асосий мақсади Эрон ядро дастури ва ҳарбий инфратузилмасини бутунлай йўқ қилиш бўлган. Бироқ бугунги кунда АҚШда ҳам демократлар, ҳам республикачиларнинг аксарияти Эрон барибир ядро қуролини яратади, деган фикрга қўшилмоқда.
