2026-йилги Жаҳон чемпионати гуруҳ босқичига қуръа ташлаш маросимида нафақат футбол олами вакиллари, балки бошқа спорт юлдузлари, шунингдек, машҳур шахслар ҳам қатнашади. Бу ҳақида FIFAнинг расмий саҳифасида хабар берилди.
Тадбирда “Манчестер Юнайтед” ва Англия терма жамоасининг собиқ ҳимоячиси Рио Фердинанд, Америка футболи афсоналари Илай Меннин ва Том Бреди, Канада ҳоккей жамоасининг собиқ юлдузи Уэйн Грецки, “Нью-Йорк Янкис” бейсболчиси Аарон Жаж ҳамда дунёга машҳур баскетбол юлдузи Шакил O’Нил қатнашади. Тадбирда Саманта Жонсон бошловчилик қилади.
Маросимнинг бадиий қисмида эса жаҳон эстрадасининг кўплаб юлдузлари саҳнага чиқди. Машҳур италиялик тенор Андреа Бочелли, британиялик поп-юлдузи Робби Уильямс ва қўшиқчи Никол Шерзингер ўз чиқишлари билан меҳмонларга кайфият улашади. Шунингдек, афсонавий “Қишлоқ одамлари” (Village People) гуруҳи ҳам қатнашиб, машҳур “Y.М.C.А.” қўшиғини ижро этиши кутилмоқда.
Эслатиб ўтамиз, тарихда илк бор 48 та жамоа иштирок этадиган мундиал қуръа ташлаш маросими 5 декабрь куни Тошкент вақти билан соат 22:00 да бўлиб ўтади. Унда Ўзбекистон миллий терма жамоаси ҳам Жаҳон чемпионатидаги рақибларини билиб олади. Тадбирда ЎФА раҳбарияти, терма жамоа бош мураббийи Фабио Каннаваро, мураббийлар штаби ҳамда FIFA томонидан таклиф этилган ўзбек футболи афсонаси Миржалол Қосимов иштирок этади.
