Россия президенти Владимир Путин АҚШ маъмурияти таклиф этган тинчлик режасининг учта банди бўйича ён беришга тайёр эмас. Бу ҳақда хабардор россиялик манбага таяниб, NBC News маълум қилди.
Манбанинг айтишича, Москва Донбасс ҳудуди, Украина армияси сонини чеклаш ва босиб олинган ҳудудларни халқаро миқёсда тан олиш масалаларида муросага боришни истамайди. АҚШ махсус вакили Стив Уиткофф 2 декабрь куни Кремлда Владимир Путин билан музокаралар ўтказди. Унда Украина билан келишилган тинчлик режаси лойиҳаси тақдим этилган.
АҚШ делегациясининг Россияга сафаридан бир оз аввал украиналик ва америкалик дипломатлар Флоридада учрашув ўтказганди. Бироқ томонлар асосий масала — ҳудудий келишув бўйича олдинга силжий олмади. Украина Донбассни Москва назоратига топшириш талабини рад этмоқда.
Шунингдек, Киев ўз армияси сонини 600 минг аскаргача қисқартириш ва НАТОга аъзо бўлишдан воз кечиш шартларини ҳам қабул қилмаган. Украина президенти Владимир Зеленский 1 декабрь куни ҳудудий масала “энг мураккаби” эканини айтиб, Флоридадаги музокараларда бу мавзу 6 соатдан ортиқ муҳокама қилинганини таʻкидлади.
Путин эса ўтган ҳафта Украина армияси “эгаллаб турган ҳудудларни” тарк этгандагина уруш тўхтатилишини билдирди. Бундан ташқари, Киевнинг амалдаги раҳбарияти билан келишув “юридик жиҳатдан имконсиз” эканини таʻкидлади.
Маълумот ўрнида, АҚШ аввал 28 банддан иборат тинчлик режасини ишлаб чиққан эди. Унда Москвага бир қатор катта ён беришлар кўзда тутилган: бутун Донбассни топшириш, армияни қисқартириш, НАТОдан воз кечиш ҳамда Россиянинг ҳарбий жиноятлар учун жавобгарлигидан воз кечиш. Украина билан маслаҳатлашувлардан сўнг бу талабларнинг бир қисми юмшатилган ёки ўзгартирилган.
Кремлдаги музокаралар муваффақиятсиз тугади
Кремлнинг маълум қилишича, 2 декабрь куни Путин ва Стив Уиткоффнинг Украинада тинчлик ўрнатиш бўйича учрашуви самарали ўтди. Бироқ томонлар ҳудудий масалаларда келишувга эришмади. Улар музокараларнинг батафсил мазмунини ошкор қилмасликка келишиб олишган.
“Ҳозирча муросали ечим топилмади, аммо баъзи Америка таклифлари маъқул кўринмоқда, лекин уларни батафсил муҳокама қилиш лозим. Бизга тақдим этилган айрим таклифлар бизга тўғри келмайди, яъни иш давом эттирилади. Аммо бу, шубҳасиз, энг муҳим масалалардан биридир”, деди Россия президенти маслаҳатчиси Юрий Ушаков.
У Кремлдаги учрашув беш соат давом этганини айтди ва томонлар масалаларнинг моҳиятини муҳокама қилганини билдирди. Музокараларда Дональд Трампнинг куёви Жаред Кушнер ҳам иштирок этган.
