Норвегия ҳукумати 5 октябрь куни мамлакатдаги айрим жойларда сунъий интеллектга эга кўзойнаклардан фойдаланишни вақтинча тақиқлашни таклиф қилди. Бунга одамлар ўзларининг хабарисиз суратга олиниши, видеога туширилиши ёки овози ёзиб олинишидан хавотир билдираётгани сабаб қилиб кўрсатилди.
Қайд этилишича, бу таклиф дунё бўйлаб камерага эга “ақлли” кўзойнаклар келтириб чиқараётган махфийлик муаммоларига қарши норозиликлар фонида ўртага ташланмоқда.
Ҳукумат баёнотига кўра, тақиқ парклар, пляжлар, музейлар, савдо марказлари ва оммавий тадбирлар ўтказиладиган жойлар каби одамлар мунтазам равишда тўпланадиган ҳудудларга нисбатан қўлланиши мумкин. Рақамлаштириш ва давлат бошқаруви вазири Торгеир Микалсен вазиятга қуйидагича муносабат билдирди:
“Одамлар ўзлари билмаган ҳолда суратга олиниши, видеога туширилиши ёки овози ёзиб олиниши хавфи мавжуд бўлган янги, кучли технологиялар жорий этилаётганидан хавотирдаман”.
Бундан ташқари, тақиқ мактаблар, болалар майдончалари, ёшлар клублари ҳамда шифокор хоналари, сув ҳавзалари ва ечиниш хоналарига эга спорт заллари каби жойларга ҳам тааллуқли бўлиши мумкин. Ҳукумат буни тўлиқ тақиқ эмаслигини билдирди. Шахсий фойдаланиш ҳамда бошқалар розилигисиз тасвирга тушиш хавфи бўлмаган ҳолларда кўзойнаклардан фойдаланишга рухсат берилаверади.
Расмийлар чеклов қайси технологияларга тааллуқли бўлишини ўрганиб чиқади. Бунга камерали ва овоз ёзиш мосламали кўзойнаклар, камера ва СИ функсияларига эга кўзойнаклар ёки танага тақиладиган, камера, овоз ёзиш ва/ёки СИ хусусиятига эга бошқа технологиялар ҳам кириши мумкин.
Озчилик ҳукумати парламентга имкон қадар тезроқ қонун лойиҳасини тақдим этишини маълум қилди. Шунингдек, танага тақиладиган технологияларни доимий равишда тартибга солиш бўйича экспертлар гуруҳи тузилади.
