Аргентина инвестициялар эвазига мамлакат фуқаролигини олиш имконини берувчи дастурни ишга туширишга тайёрланмоқда. Бу ҳақда Financial Times газетаси хабар бермоқда.
Нашр манбаларига кўра, Аргентина тахминан 500 минг долларлик қайтарилмас хайрия ёки бир миллион долларлик давлат облигацияларини сотиб олиш эвазига паспорт беради. Газета суҳбатдошлари дастур шартлари ўзгариши мумкинлигини қайд этган.
Мамлакат ҳукумати “олтин паспортлар” деб аталувчи ушбу дастур Аргентинага яқин йилларда ўнлаб миллиард долларлик қарзларини тўлашга ёрдам беришига умид қилмоқда.
Дастур учун масъул бўлган Аргентина Иқтисодиёт вазирлиги изоҳ беришдан бош тортган.
Агар дастур тасдиқланса, Аргентина инвестиция эвазига фуқаролик таклиф қиладиган йирик давлатлардан бирига айланади. Шу билан бирга, Аргентина паспорти дунёнинг деярли 170 мамлакатига визасиз саёҳат қилиш имконини беради.
“Бу инвестиция эвазига олинадиган бошқа ҳар қандай паспортга қараганда кўпроқдир”, дейилади хабарда.
Россия ва Украина ўртасидаги кенг кўламли уруш бошланганидан сўнг Аргентина кўчиб ўтиш учун асосий йўналишлардан бирига айланди. Шу сабабли, Аргентина 2025-йилда ўз миграция қонунчилигини кучайтирган. FT’нинг ёзишича, ҳукумат қонунларни қатъийлаштиришга, жумладан, инвестиция эвазига фуқаролик олиш дастурини жорий этиш учун ҳам қарор қилган.
Сўнгги йилларда Европа мамлакатлари ҳукумати “олтин паспорт” дастурларини босқичма-босқич тугата бошлади. Еврокомиссия ЕИ аъзоларини ушбу схема бўйича россияликлар ва беларусларга берилган фуқароликни бекор қилишга чақирган эди.
