Аргентинада фавқулодда хизмат раҳбарларини олиб кетаётган вертолёт қулаб тушди. Сан Хуан губернатори Марсельо Оррего фожиа оқибатида етти киши ҳалок бўлганини маълум қилди.
Ҳодиса ўрмон ёнғинларини ўчириш машғулотлари пайтида содир бўлган.
“Провинциямизда юз берган вертолёт ҳалокати оқибатида етти кишининг фожиали равишда ҳалок бўлгани ҳақидаги хабарни чуқур қайғу билан қабул қилдик” деди Оррего.
Унинг сўзларига кўра, вертолёт бортида ўз ҳаётини маҳаллий аҳолини ҳимоя қилишга бағишлаган давлат хизматчилари бўлган. Улар орасида фуқаро муҳофазаси хизмати директори, полиция бошлиғи ўринбосари, ёнғин хавфсизлиги хизмати бошлиғи, унинг ўринбосари ва Федерал фавқулодда вазиятлар агентлиги ходимлари бор. Ҳодиса оқибатида учувчи ҳам ҳалок бўлган.
“Ушбу қайғули дамда барча ҳалок бўлганларнинг оила аъзоларига чуқур ҳамдардлик билдираман. Биз яқинларини йўқотган ҳар бир инсоннинг қайғусига шерикмиз”, дея хулоса қилди губернатор.
The Sun нашрининг ёзишича, Bell 412 вертолёти билан алоқа парвоз вақтида узилган, унинг қолдиқлари кейинчалик маҳаллий тоғ-кон компанияси вертолёти экипажи томонидан топилган. Қутқарувчилар ҳалокат тоғли ҳудудда юз бергани ва бориш қийинлиги сабабли у ерга фақат пиёда етиб бора олган.
Сан Хуан — Аргентинанинг ғарбидаги Чили билан чегарадош провинция. У Куё минтақасига киради ва мамлакатнинг тоғ-кон саноати марказларидан бири ҳисобланади. Бу ерда олтин, кумуш ва мис қазиб олинади, шунингдек, мис конларини ўзлаштириш бўйича йирик лойиҳалар амалга оширилмоқда.
