Кеча, 10 июль куни Багама оролларида кичик йўловчи самолёти ҳалокатга учраши оқибатида бортдаги барча 10 киши ҳалок бўлди. Бу ҳақда “Тhе New York Post” хабар берди.
Қайд этилишича, Cessna 402C Flamingo Air самолёти Нассау шаҳридаги Lynden Pindling халқаро аэропортидан Сан-Андрос оролига парвоз қилганидан кўп ўтмай қулаб тушган. Самолёт ҳалокатдан аввал ҳавода техник ёки бошқа муаммоларга дуч келганини билдирган.
Ижтимоий тармоқларда тарқалган видеоларда Шимолий Андрос оролидаги ўрмон ҳудудида самолёт қолдиқлари сочилиб ётгани ва айрим қисмларидан тутун чиқаётгани акс этган.
Дастлаб бир киши ҳалокатдан омон қолгани айтилган, бироқ у кейинчалик олган жароҳатлари сабаб вафот этган. Расмийлар қурбонларнинг шахсини аниқлаш ишлари давом этаётгани ва барча яқинларига хабар берилмагунча тўлиқ рўйхат эълон қилинмаслигини маълум қилган.
Фожиа сабабларини аниқлаш бўйича тергов бошланган. Воқеадан сўнг Багама ҳукумати эҳтиёт чораси сифатида Flamingo Air авиакомпаниясининг барча парвозларини вақтинча тўхтатган.
Маълумот учун, ҳалокатдан бир неча соат аввал ҳам ушбу авиакомпанияга тегишли бошқа самолёт техник муаммо сабаб Нассау аэропортига қайтишга мажбур бўлган, бироқ ундаги йўловчилар хавфсиз эвакуация қилинган.
