Россиянинг Рязань шаҳрига қилинган дрон ҳужуми оқибатида 3 киши ҳалок бўлди, 12 нафар инсон жароҳат олди. Бу ҳақда шаҳар губернатори Павел Малков маълум қилди.
Унинг айтишича, жабрланганлар орасида болалар ҳам бор. Барча ярадорларга зарур тиббий ёрдам кўрсатилган.
Ҳужум оқибатида иккита кўп қаватли турар жой биносига зарар етган. Шунингдек, дрон қолдиқлари саноат объектларидан бири ҳудудига тушган.
Ҳозирда тезкор хизматлар вайронагарчилик оқибатларини бартараф этиш ва шикастланган конструкцияларни демонтаж қилиш ишларини олиб бормоқда. Аҳоли эвакуация қилиниб, вақтинчалик жойлаштириш пунктлари ташкил этилган.
Губернатор ижтимоий хизматлар ва мутасадди идораларга жабрланганлар ҳамда ҳалок бўлганлар оилаларига барча зарур ёрдамни кўрсатиш бўйича топшириқ берган.
