Туркиянинг Истанбул шаҳрида севгилисини бир неча маротаба пичоқлаб ўлдирган 47 ёшли Ўзбекистон фуқароси (Р.О.) умрбод қамоқ жазосига ҳукм қилинди. Суд уни қасддан одам ўлдириш жиноятини содир этганликда айбли деб топди.
Марҳума (В.У.) ҳам Ўзбекистон фуқароси бўлиб, 47 ёшда эди. Қотиллик 18 апрель куни эрталаб соат 09:30 атрофида Пендик туманининг “Кайнаржа” маҳалласида содир бўлган. Аёл ўзи билан бирга яшаган севгилиси томонидан шафқатсизларча пичоқланган.
Полиция ходимлари воқеадан кейин гувоҳларнинг кўрсатмаларини олган. Уларнинг сўзларига кўра, аёл ва эркак ўртасида жанжал келиб чиққан. Р.О. севгилисини мажбуран ертўлага судраб кетмоқчи бўлган. Шу пайт қўшнилар воқеага аралашишга уринган.
Қўшниларнинг “тўхта, ундай қилма” деган қичқириқларига қарамай, Р.О. аёлни бир неча марта пичоқлаб, воқеа жойидан қочиб кетган. Қотил полиция ходимларининг тезкор ҳаракатлари натижасида қисқа фурсатда қўлга олинган.
Эркак полиция бўлимида сўроқдан сўнг 19 апрель куни Анадолу судига юборилган ва прокурор баёнотидан кейин қамоққа олинган. Анадолу бош прокуратураси томонидан тайёрланган айблов хулосасида эркакка нисбатан “қасддан одам ўлдириш” моддаси бўйича оғирлаштирилган умрбод қамоқ, “қуролдан фойдаланган ҳолда талон-торож қилиш” моддаси бўйича эса 10 йилдан 15 йилгача озодликдан маҳрум қилиш жазосини тайинлаш сўралган.
“Россияда бўлганимда ҳеч кимни ўлдирмадим, ҳеч кимга жароҳат етказмадим. Ўзбекистонда жанжал бўйича судланганман, қамоқда ўтириб чиққанман. Сўнгги сўзни айтаётган судланувчи сифатида, менга қўйилган айбловни тан оламан.
Пушаймонман. Ўзбекистонда 80 ёшли онам бор, унга қарашим керак. Агар берадиган жазойингиз енгил бўлса, ёрдам қилган бўласиз, озод қилишингизни сўрайман”, деган судланувчи.
Воқеанинг бевосита гувоҳи бўлган шахс судда даҳшатли воқеани қуйидагича ҳикоя қилган:
“Эрталаб соат 8:30 атрофида қичқириқ овозидан уйғониб кетдим. Ташқарига чиқдим ва айбланувчи билан аёлни кўрдим. Бу воқеа эшигимнинг олдида содир бўлди. Айбланувчи аёлнинг бўйнига пичоқ тираб, уни ертўлага туширишга уринаётганди. Биз ‘бундай қилма’ деб бақирдик, аммо полиция келгунча у аёлни ертўлага туширишга улгурди. Ертўлага туширгач, унинг орқасига 3–4 марта пичоқ урди”, деди у.
Бошқа бир гувоҳ эса шундай деди:
“Эрталаб соат 8 ларда аёлнинг қичқириғини эшитиб, ташқарига чиқдим. Аввал уни ўғри деб ўйладим. Аёл югуриб ташқарига чиққанида, унинг қўлидан ушлаб пастга тушдим. Шу пайт эркак орқасидан етиб келиб, пичоқ билан ура бошлади. Аёлнинг сумкасини олиб, эркакка қарата отдим, лекин у сумкани олиб қочиб кетди”.
Республика прокурори якуний хулосасида айбланувчини аёлга нисбатан қасддан одам ўлдириш жинояти учун жазолашни талаб қилди. Шунингдек, айбланувчи марҳумага тегишли сумкани ўғирлагани сабабли ўғрилик жинояти учун ҳам жазо тайинлаш сўралди.
Натижада Ўзбекистон фуқароси қотиллик учун оғирлаштирилган умрбод қамоқ жазосига, қурол билан талон-торож қилиш жинояти эса ўғрилик жинояти сифатида баҳоланиб, 6 йил муддатга озодликдан маҳрум қилиш жазоси белгиланди.
