АҚШнинг Огайо штатида 42 ёшли ўзбекистонлик юк машина ҳайдовчиси Беҳзод Асроров автоҳалокат оқибатида коллеж футболчиси бўлган 21 ёшли Тобиас Форсайтнинг ўлимига сабаб бўлган. Ҳодисадан сўнг, у далилларни йўқ қилишга урингани айтилмоқда. Бу ҳақда “FoxNews” хабар берди.
Қайд этилишича, воқеа жорий йилнинг 4 июль куни Огайо штатининг Мадисон округида 71-сонли автомагистралда содир бўлган. Асроров бошқарувидаги юк машинаси Форсайтнинг Honda Accord автомобилини орқа томондан уриб юборган. Кучли зарба оқибатида 21 ёшли футболчи воқеа жойида ҳалок бўлган. Шундан сўнг юк машинаси йўлнинг қарама-қарши қатнов қисмига чиқиб кетиб, яна бир йўл-транспорт ҳодисасига сабаб бўлган.
Нашрнинг ёзишича, воқеа жойига етиб келган патруль ходимлари билан мулоқот қилишда Асроров Google Translate дастуридан фойдаланган. Манбалар унинг инглиз тилини билмаслигини айтмоқда.
Тергов давомида ҳайдовчи автомобилдаги видеорегистраторни ечиб ташлашга урингани, шунингдек, учта мобил телефони ва электрон назорат қурилмасини синдириб, далилларни йўқ қилишга ҳаракат қилгани ҳам маълум бўлган. Шу сабабли унга далилларни йўқ қилиш билан боғлиқ оғир жиноят бўйича ҳам айблов эълон қилинган.
Беҳзод Асроров АҚШга 2024-йилда грин-карта дастури орқали келган. Орадан кўп ўтмай, у ушбу штатда тижорат юк машиналарини бошқариш ҳуқуқини берувчи CDL ҳайдовчилик гувоҳномасини олган
“Биз Асроров каби йўл белгиларини тушунмайдиган ёки ҳуқуқни муҳофаза қилувчи органлар ходимлари билан инглиз тилида мулоқот қила олмайдиган ҳайдовчиларга АҚШ магистралларида 80 минг фунт (қарийб 36 тонна) юк ташувчи автомобилларни бошқаришга рухсат бера олмаймиз. Тобиаснинг оиласи ва яқинларига чуқур ҳамдардлик билдираман. Бошқа ҳеч бир ота-она бундай оғир жудоликка дуч келмаслиги учун йўллардаги хавфли ҳайдовчиларни четлатиш бўйича курашни тўхтатмаймиз”, деди АҚШ транспорт вазири Шон Даффи.
Ҳалок бўлган Тобиас эса UMass Lowell университети футбол жамоасининг дарвозабони эди. У жамоага яқинда қўшилган бўлиб, мураббийлар ва жамоадошлари уни тиришқоқ, камтар ва ўз устида тинимсиз ишлайдиган спортчи сифатида эсламоқда.
Воқеадан сўнг АҚШ Транспорт департаменти тижорат ҳайдовчиларининг инглиз тилини билиш даражаси ва малака талабларига риоя этилиши устидан назорат янада кучайтирилишини маълум қилди.
