Лондон шимолидаги Бедфорд шаҳри яқинида кеча, 19 июнь куни кечқурун иккита йўловчи поезди тўқнашиб кетиши оқибатида камида бир киши ҳалок бўлди, яна ўнлаб одамлар жароҳатланди. Бу ҳақда “The New York Times” хабар берди.
Расмийларнинг билдиришича, ҳодиса маҳаллий вақт билан тахминан соат 17:15 да Англиянинг марказий-жанубий қисмидаги Бедфорд шаҳри яқинида содир бўлган. Транспорт полицияси маълумотига кўра, воқеадан сўнг полиция ва тиббиёт ходимлари иштирокида кенг кўламли қутқарув амалиёти бошланган.
Шарқий Англия тез ёрдам хизмати баёнотида айтилишича, авария жойида бир киши ҳалок бўлган. Яна 33 киши оғир ва 56 киши эса енгил тан жароҳатлари олган.
Орадан кўп ўтмай эълон қилинган яна бир баёнотда Британия темир йўл ходимлари касаба уюшмаси поездлардан бирининг машинисти, аввал касаба уюшмаси вакили бўлиб ишлаган ходим ҳалок бўлганини маълум қилган.
“Бу худди бомба портлагандек, гўё портлаш ичида қолгандек туюлди. Мен орқадан келиб, олдиндаги поездга урилган поезднинг бош вагонида кетаётган эдим. Ҳозир ҳам юра олаётганим ва нафас олаётганимга ҳайронман”, дейди ҳодиса иштирокчиси Питер Кнапп.
Кнаппнинг сўзларига кўра, тўқнашувдан кейин вагон ичи чангга тўлиб, ўриндиқлар эса ҳар томонга сочилиб кетган. У айрим йўловчиларнинг юзлари қонга беланганини кўрганини, камида икки кишининг ҳаёти хавф остида бўлган жароҳатлар олганига гувоҳ бўлганини айтган. Ўзи эса болдир қисмидан қон кетганини, ҳодисадан кейин бели қаттиқ оғриб қолганлиги сабабли ногиронлар аравачасига ўтиришга мажбур бўлганини маълум қилган.
Буюк Британия Бош вазири Кир Стармер тўқнашув ҳақидаги хабарлар жуда ташвишли эканини билдириб, ҳалок бўлган шахснинг оиласига ва жароҳатланганларга ҳамдардлик изҳор этган.
Тўқнашган поездлар Англиянинг энг гавжум темир йўл бекатларидан бири бўлган Лондон Сент-Панкрас Интернешнл томон йўл олган бўлган. Британиянинг темирйўл оператори “East Midlands Railway” маълумотига кўра, улар ўз йўналишлари бўйича тахминан бир соат фарқ билан ҳаракатланган.
Темир йўл ҳодисаларини текшириш бошқармаси вакиллари эса тўқнашув қандай юз берганини аниқлаш учун мутахассислар гуруҳи воқеа жойида далиллар тўплаётганини маълум қилган.
