ҲАМАС Рафаҳнинг Исроил назоратидаги ҳудудларида қолиб кетган жангчилари таслим бўлмаслигини маълум қилди. Фаластин қуролли ҳаракати томонидан эълон қилинган баёнотда ҳамкорлардан “жорий сулҳни хавф остига қўяётган инқирозга ечим топиш” сўралган.
Reuters манбаларига кўра, воситачилар жангчиларни қуролсизлантириш эвазига Ғазо секторининг бошқа ҳудудларига ўтиш имконини берувчи таклифни муҳокама қилишмоқда.
Қоҳиранинг таклифига кўра, Рафаҳда қолиб кетган жангчилар қуролларини Миср армиясига топшириб, ерости туннеллари жойлашуви ҳақида маълумот беради. Шундан сўнг мисрликлар уларни йўқ қилишади. ҲАМАС ҳарбий қаноти “Ал-Қассам” эса бунга жавобан баёнот тарқатди.
Душман билсинки, таслим бўлиш ва ўзини топшириш тушунчаси “Ал-Қассам” луғатида мавжуд эмас, дейилади унда.
АҚШ махсус вакили Стив Уиткофф эса мазкур таклифни “Ғазодаги барча ҲАМАС кучларини қуролсизлантириш йўлидаги синов босқичи” деб атади.
Воситачилар ўз масъулиятини ҳис этиши керак. Акс ҳолда, душман шуни баҳона қилиб сулҳни бузади ва Ғазода бегуноҳ фуқароларни нишонга олади, дея қўшимча қилган “Ал-Қассам”.
АҚШ воситачилигида сулҳ жорий этилган 10 октябрдан буён амал Рафаҳ атрофида камида икки бор тўқнашув кузатилган. Исроил ҳужумларда ҲАМАСни айблаб, анклавга зарба берди. Фаластин қуролли ҳаракати эса ўзининг бу ҳужумларга алоқадорлигини рад этган.
Оташкесим кучга кирганидан бери ҲАМАС 28 нафар исроилликлардан 23 нафарининг жасадларини топширган. Бироқ вайронагарчиликлар ва махсус техникалар етишмаслиги туфайли қолган жасадларни топиш мушкул бўлиб қолмоқда. Исроил эса ҲАМАСни “вақтни чўзишда” айблаган.
