Ўзбекистон миллий терма жамоасида собиқ бош мураббий, октябрь ойидан бери ёрдамчи мураббий сифатида фаолият юритаётган Темур Кападзе терма жамоадан кетди. Бу ҳақда Ўзбекистон футбол ассоциацияси (ЎФА) матбуот хизмати хабар берди.
44 ёшли мутахассис ўз фаолиятини янги босқичда давом эттириш ниятида, ЎФА раҳбариятига лавозимидан озод этилиш тўғрисида мурожаат қилган. Унга бошқа таклифлар тушгани ва мураббийлик фаолиятини бош мураббий сифатида давом эттириш ниятида эканлиги сабабли, раҳбарият унинг қарорини ҳурмат билан қабул қилган.
“Ўзбекистон футбол ассоциацияси Темур Кападзенинг ўзбек футболи ривожига қўшган ҳиссаси учун самимий миннатдорлик билдиради ва унинг мураббийлик фаолиятида катта муваффақиятлар тилайди”, дейилади ЎФА баёнотида
Маълумот учун, Кападзе 2025-йилнинг январь ойидан 6 октябрга қадар миллий терма жамоани бошқарган. Шу даврда у 9 та учрашув ўтказиб, 5 тасида ғалаба, 4 тасида эса дуранг қайд этган. Кейинчалик Кападзе Ўзбекистон терма жамоасининг амалдаги бош мураббийи Фабио Каннаварога ёрдамчи бўлиб фаолият олиб борди.
Шунингдек, Кападзе 2022 ва 2024-йилларда Ўзбекистон U-23 терма жамоасини Осиё Кубоги финалига олиб чиққан. Бундан ташқари, у Ўзбекистон Олимпия терма жамоаси билан тарихда илк бор ёзги Олимпия ўйинлари йўлланмасини қўлга киритган.
