Ўзбекистонда фуқаролик паспорти, ID-карта ёки хорижга чиқиш паспортини йўқотиб қўйган ёхуд яроқсиз ҳолга келтирган шахсларни маъмурий жавобгарликка тортмаслик тартиби жорий этилиши кутилмоқда. Бу ҳақда Президент Шавкат Мирзиёевнинг кеча, 15-июль куни имзолаган “Аҳолига кўрсатилаётган давлат хизматларини такомиллаштириш ҳамда фуқаролар учун қўшимча қулайликлар яратиш чора-тадбирлари тўғрисида”ги 265-сон қарорида белгиланди.
Янги тартиб жорий этилса, шахсини тасдиқловчи ҳужжатини йўқотган фуқаролар энди аввалгидек маъмурий жарима тўламайди. Улар фақат янги ҳужжатни расмийлаштириш учун белгиланган давлат божига қўшимча тўловни амалга оширган ҳолда паспорт, ID-карта ёки хорижга чиқиш паспортини қайта олиши мумкин бўлади.
Қарорга кўра, мазкур тартибни жорий этиш бўйича таклифлар ҳамда тегишли норматив-ҳуқуқий ҳужжатлар лойиҳалари жорий йилнинг октябрь ойига қадар Ички ишлар вазирлиги ва Адлия вазирлиги томонидан ишлаб чиқилиб, Вазирлар Маҳкамасига киритилиши лозим.
Маълумот учун, айни пайтда амалдаги тартибда бундай ҳолатлар учун фуқароларга маъмурий чоралар қўлланади. Янги механизм эса ҳужжатларни қайта расмийлаштириш жараёнини соддалаштириш ва фуқаролар учун қўшимча қулайликлар яратишга қаратилган.
