Покистон хавфсизлик кучлари 21 апрель куни Хайбер-Пахтунхва провинциясининг Хайбер туманида ўтказилган тўқнашувларда 22 нафар жангарини отиб ўлдирди. Отишма вақтида ўртада қолган ёш бола ҳам вафот этди. Бу ҳақда The Dawn хабар берди.
Маълум қилинишича, хавфсизлик кучлари ва ҳуқуқ-тартибот идоралари ҳамкорлигида “террорчи”ларга қарши ҳарбий амалиёт ўтказилган. Хайбар тумани Афғонистон билан чегарадош бўлиб, амалиёт давомида шиддатли отишма содир бўлган.
Отишма оқибатида 10 ёшли бола ҳалок бўлган. Бош вазир Шаҳбоз Шариф ўз баёнотида террорчилар томонидан очилган асоссиз ўт очиш оқибатида боланинг шаҳид бўлганидан қайғуда эканини билдирди.
Ҳарбий баёнотда айтилишича, амалиёт давомида “Фитна ал-Хавориж” гуруҳига мансуб 22 нафар жангари йўқ қилинган. Покистон расмийлари мамлакатда тақиқланган “Таҳрики Толибон Покистон” (ТТП) аъзоларига нисбатан айнан шу атамани қўллайди.
Жангарилар йўқ қилинган жойдан кўплаб қурол-яроғ ва ўқ-дорилар топилган. Ушбу шахслар ҳудудда кўплаб терактларни амалга оширишда фаол иштирок этиб келган.
Афғонистон билан таранг муносабатлар
Сўнгги йилларда, айниқса Афғонистон билан чегарадош провинцияларда ҳужумлар кўпайган. Покистон 2021 йилда “Толибон” ҳокимиятга қайтганидан бери Афғонистонни жангариларга бошпана беришда айблаб келмоқда. Кобул эса бу айбловларни рад этади.
Ушбу ҳолат икки қўшни давлат ўртасидаги муносабатларга путур етказди ва чегарада тез-тез тўқнашувлар келиб чиқишига сабаб бўлди. 2026 йилда Покистон мудофаа вазири бир қатор худкушлик ҳужумларидан сўнг Афғонистонга нисбатан “очиқ уруш” эълон қилди.
Вазият оғирлашмоқда
Исломободдаги Тинчлик тадқиқотлари институти ҳисоботига кўра, 2025 йилда Покистонда жангарилар зўравонлиги кескин ошган, Жумладан, террорчилик ҳужумлари 34 фоизга кўпайган. Терроризм билан боғлиқ ўлим ҳолатлари бир йил ичида 21 фоизга ошган.
Вазият айниқса Хайбар-Пахтунхва провинциясида оғир. Хавфсизлик тадқиқотлари маркази маълумотларига кўра, ҳудудда ўлим ҳолатлари 2024 йилдаги 1620 тадан 2025 йилда 2331 тага етган.
