Конго Демократик Республикасида бортида 800 дан ортиқ киши бўлган кема чўкиб кетди. Ҳодиса оқибатида бир неча ўнлаб одам ҳалок бўлган. Бу ҳақда “Actualite” хабар берди.
Нашрнинг ёзишича, фожиа жорий йилнинг 20 декабрь куни Экватор провинциясида содир бўлган. HB Mbeya Mbeya номли кема Конго дарёсида ағдарилиб кетган. Ўнлаб одамлар ҳалок бўлган, 50 дан ортиқ киши бедарак йўқолган. Тахминан 300 нафар йўловчи омон қолган. Жароҳатланганлар сони ҳозирча аниқланмаган. Манбаларга кўра, кема катта ҳажмдаги юкларни ҳам ташиётган бўлган. Топилган жасадлар кучли даражада чиригани сабабли дарҳол дафн этилган, дарёда қидирув-қутқарув ишлари эса ҳануз давом этмоқда.
Расмийларнинг дастлабки версиясига кўра, ҳалокатга кеманинг ҳаддан ташқари ортиқча юкланиши сабаб бўлган, бу эса хавфсизлик қоидаларининг қўпол равишда бузилиши ҳисобланади. Кема эгаси ва жўнаб кетиш вақтида бортда бўлган экипаж аъзоларини қўлга олиш режалаштирилмоқда.
