Хоразм вилоятида Telegram орқали фуқаролар аккаунтларини бузиб, банк карталаридан 1 млрд сўмдан ортиқ маблағни ўғирлаган гуруҳ фош этилди, дея хабар берди ИИВ ахборот хизмати.
Қайд этилишича, 10 март куни Ички ишлар органлари ва Давлат хавфсизлик хизмати ходимлари ҳамкорлигида махсус тезкор-қидирув тадбирлари ўтказилган. Унда Хонқа туманида туғилган шахслардан иборат гуруҳ олдиндан тил бириктириб, мураккаб фирибгарлик схемасини йўлга қўйгани аниқланган.
Мазкур гуруҳ аъзолари жиноий фаолиятини яшириш мақсадида бошқа фуқаролар номига расмийлаштирилган банк карталари ва мобил сим-карталардан фойдаланган. Бу орқали улар ўз ҳаракатларини ниқоблашга уринган. Гумонланувчилар Telegram мессенжерида ёпиқ гуруҳлар ташкил этган. У ерда Android қурилмалари учун мўлжалланган APK форматдаги вирусли файллар тарқатилган.
Файллар орқали фуқароларнинг Telegram аккаунтларига ноқонуний кириш амалга оширилган. Шундан сўнг жабрланувчилар номидан уларнинг яқинларига турли хабарлар юборилиб, пул маблағлари ўтказиб олинган.
Шунингдек, телефонларга боғланган банк карталари орқали ҳам маблағлар ечиб олинган. Тергов давомида гуруҳ томонидан умумий ҳисобда 1 млрд сўмдан ортиқ маблағ ўғирлангани аниқланган.
Маълум бўлишича, маблағлар «Binance», «Tonkeeper» ва «Bitget» каби платформалар орқали бошқа шахслар номига ўтказилиб, криптоактивларга айлантирилган.
Ушбу ҳолат юзасидан Жиноят кодексининг 169-моддаси 3-қисми билан жиноят иши қўзғатилган. Ҳозирда тергов ҳаракатлари давом этмоқда.
