Бугун, 1 апрель куни Веллингтон шаҳридаги “Government House” қароргоҳида бўлиб ўтган тантанали маросимда Ўзбекистоннинг Сингапурдаги элчиси Алишер Қаюмов Янги Зеландияда ўриндошлик асосидаги элчи сифатида ушбу давлат генерал-губернатори Даме Синди Кирога ишонч ёрлиқларини топширди. Бу ҳақда “Дунё” ахборот агентлиги хабар берди.
Қайд этилишича, Ўзбекистон элчиси Янги Зеландиянинг маори туб аҳолисига хос қадимий анъаналар асосида тантанали равишда кутиб олинган. Расмий маросим ва ундан кейинги суҳбат чоғида сўнгги йилларда изчил ривожланиб бораётган Ўзбекистон – Янги Зеландия муносабатларининг бугунги ҳолати ва истиқболлари муҳокама қилинган. Хусусан, сиёсий, савдо-иқтисодий, илм-фан, таълим ва бошқа соҳалардаги ҳамкорлик масалалари атрофлича кўриб чиқилган.
Генерал-губернатор Даме Синди Киро Ўзбекистон Президенти Шавкат Мирзиёев раҳбарлигида амалга оширилаётган кенг кўламли ислоҳотларни юқори баҳолаган. У давлат бошқаруви тизимини модернизация қилиш, фуқаролик жамиятини ривожлантириш ва халқаро бизнес учун қулай инвестиция муҳитини яратиш борасида эришилаётган натижаларни алоҳида таъкидлаган.
Суҳбат давомида икки мамлакат ўртасидаги дўстона муносабатларни янада мустаҳкамлаш, сиёсий мулоқотни фаоллаштириш, шунингдек савдо-иқтисодий, маданий-гуманитар ва бошқа ўзаро манфаатли соҳаларда амалий ҳамкорликни кенгайтириш муҳим экани қайд этилган.
Шу билан бирга, Янги Зеландия томони мамлакатлар ўртасидаги парламентлараро алоқаларни ҳамда бошқа соҳаларда йўлга қўйилган ҳамкорликни изчил давом эттиришга тайёр эканини билдирган.
Учрашув якунида генерал-губернатор Даме Синди Киро икки томонлама муносабатларни бундан буён ҳам мустаҳкамлашдан манфаатдор эканини таъкидлаб, Ўзбекистон раҳбарияти ва халқига самимий тилакларини йўллаган.
