Россиянинг асосий экспорт нефти бўлган Urals маркали нефть нархи баррелига тахминан 34 долларгача пасайди. Бу АҚШ томонидан ушбу соҳадаги энг йирик компаниялар – “Роснефть” ва “Лукойл”га қарши жорий этилган санкциялар фонида содир бўлди. Бу ҳақда кеча, 22 декабрь куни Argus Media компанияси маълумотларига таянган ҳолда, “Bloomberg” агентлиги хабар қилди.
19 декабрь куни Болтиқ денгизи портларидан етказиб бериш шарти билан Urals нефти баррелини 34,82 долларга, Қора денгиз портларидан эса 33,17 долларга сотиб олиш мумкин бўлган. Таққослаш учун, шу куни эталон Brent нефти нархи 61 долларни ташкил этган. “Bloomberg” таъкидлашича, бир йил давомида Brent нархи Urals’га нисбатан анча кам пасайган, бу эса санкциялар таъсирини кўрсатади.
Argus маълумотларига кўра, ҳозирда Россиядан жўнатилаётган Urals нефтига берилаётган чегирма ўртача баррелига 27 долларни ташкил этмоқда. Нефть Ҳиндистонга етиб боргач, чегирма тахминан 7,5 долларгача қисқаради. Шу билан бирга, “Bloomberg” ёзишича, Россия нефтининг жуда арзон нархлари айрим нефть қайта ишлаш заводларини санкцияларга эътибор бермасдан уни сотиб олишга ундамоқда.
“Bloomberg” 16 декабрь куни Argus Media маълумотларига таянадиган ҳолда, Россия экспортчилари Болтиқ, Қора ва Япон денгизлари портларидан жўнатилган нефть учун ўртача баррелига 40 доллардан сал кўпроқ даромад олаётганини ёзган эди. Ўшандаёқ агентлик “Россия нефти нархлари Украинадаги уруш бошланганидан бери энг паст даражага тушгани”ни қайд этган.
Россиянинг нефть қазиб олувчи компаниялари “Лукойл”, “Роснефть” ва уларнинг 34 та шуъба корхонаси жорий йил октябрь ойида Россиянинг Украинага қарши урушини давом эттираётгани фонида АҚШ ва Буюк Британия санкцияларига тушган. АҚШ ҳукумати бу қарорни “Россиянинг тинчлик жараёнига жиддий қизиқиши йўқлиги” билан изоҳлаган.
18 декабрь куни эса Буюк Британия ҳукумати 24 нафар жисмоний ва юридик шахсга нисбатан санкциялар жорий қилди. Улар орасида “Татнефть”, “Русснефть”, “Руснефтегаз” ва “ННК-Ойл” каби компаниялар ҳам бор. Шу куни Европа Иттифоқи Россиянинг “соя флоти”га мансуб 41 та танкерни қора рўйхатга киритди. Натижада санкция остидаги кемалар сони 600 тага яқинлашди.
