АҚШ ҳарбийлари 7 январь куни Атлантика океанида Россия байроғи остида ҳаракатланаётган Венесуэлага тегишли нефть танкерини қўлга олди. Россия депутатлари бунга жавобан рус ҳарбийларини АҚШ кемаларини чўктиришга ва Европага “Орешник” ракеталари билан зарба беришга чақирди.
Россия Давлат думаси Мудофаа қўмитаси раиси ўринбосари Алексей Журавлёв “Маринера” танкерига нисбатан АҚШ ҳаракатларини “қароқчилик” деб атади ва буни Россия ҳудудига тажовуз билан тенглаштирди.
“Торпедалар билан ҳужум қилиб, бир жуфт Америка қирғоқ қўриқлаш катерларини чўктириш мумкин. Улар ўз қирғоқларидан бир неча минг километр узоқликда қўриқлаш ишларини олиб бормоқда. Менимча, Венесуэладаги махсус операциядан сўнг ўзига хос жазосизлик эйфориясида бўлган АҚШни ҳозир фақат шундай бурнига чертиш билан тўхтатиш мумкин”, деб таклиф қилди Журавлёв.
Давлат думаси депутати Андрей Гурулёв эса “Маринера”га қарши операция Ғарбнинг “катта урушга тайёргарлигининг бир қисми” эканини айтди. Унинг фикрича, Россия “душман логистикасини” ҳар қандай йўл билан, жумладан “Орешник”дан фойдаланган ҳолда олдиндан йўқ қилиши керак.
“Украина учун ўқ-дорилар ишлаб чиқарадиган Rheinmetall заводига (Германияда жойлашган) зарба беришга нима тўсқинлик қилмоқда? Ҳеч нарса халақит бермайди. Шунда ўқ-дорилар тугайди. Бизга барча каналларни ёпиш учун сиёсий ирода керак”, деди Гурулёв.
Reuters хабарига кўра, Венесуэладан йўлга чиққан ва очиқ денгизда Россия байроғини кўтарган “Маринера” танкери АҚШ соҳил қўриқлаш хизмати томонидан ҳарбий-денгиз кучлари кўмагида Буюк Британия ва Исландия оралиғида тўхтатилган. Москванинг дипломатик каналлар орқали таъқибни тўхтатиш ҳақидаги мурожаатига қарамай, кема қўлга олинган.
АҚШ Қуролли кучларининг Европа қўмондонлиги маълумотига кўра, Мурманскка йўл олган танкер АҚШ суди томонидан берилган ордер асосида Америка санкцияларини бузгани учун ушланган. Россия кемани кузатиб бориш учун сувости ва ҳарбий кемаларни юборган, бироқ улар Венесуэладан сохта байроқ остида чиққан танкернинг қўлга олинишига қаршилик қилмаган. Оқ уй матбуот котиби Керолайн Левиттнинг айтишича, экипаж аъзолари, жумладан Россия фуқаролари ҳам судга тортилади.
