Эрон Қўшма Штатлар билан имзоланиши кутилаётган ўзаро англашув меморандуми лойиҳасининг 14 та бандини маълум қилди. Бу ҳақда “Меҳр” ахборот агентлиги ўз манбаларига таяниб хабар берди.
Ҳужжат лойиҳаси қуйидаги бандларни ўз ичига олади:
1. Барча жабҳаларда, жумладан, Ливанда урушни тўлиқ ва зудлик билан тўхтатиш.
2. АҚШ Эроннинг ички ишларига аралашмаслиги ва унинг суверенитетини ҳурмат қилиши.
3. 30 кун ичида денгиз блокадасини тўлиқ бекор қилиш.
4. Америка қўшинларини Эронга атрофидан олиб чиқиб кетиш.
5. 30 кун ичида Ҳормуз бўғозида кемалар ҳаракатини Эрон тартибига асосан қайта тиклаш.
6. Нефть, нефть-кимё маҳсулотлари ва ундан олинган маҳсулотларени сотиш бўйича санкцияларни тўхтатиб туриш ҳамда Эроннинг ўз молиявий ресурсларидан тўлиқ фойдаланишини таъминлаш.
7. АҚШ ва унинг иттифоқчилари томонидан Теҳронга 300 миллиард доллар миқдорида ёрдам кўрсатилиши.
8. Ядровий масалалар бўйича якуний келишувга эришиш учун 60 кунлик музокараларни бошлаш. Бу даврда АҚШ санкциялари, БМТ Хавфсизлик Кенгаши ва Атом энергияси бўйича халқаро агентлик (МАГАТЭ) Бошқарувчилар кенгаши резолюциялари тўлиқ бекор қилиниши керак.
9. Эрон Ядро қуролини тарқатмаслик тўғрисидаги шартномага содиқлигини қайта тасдиқлаши.
10. АҚШ минтақадаги қўшинлари сонини оширмаслик ва янги санкциялар жорий этишдан воз кечиш мажбуриятини олади.
11. 60 кунлик музокаралар давомида АҚШ музлатилган 24 миллиард долларлик молиявий активларни блокдан чиқариш мажбуриятини олади. Бу маблағнинг ярми музокаралар бошланишидан олдин Теҳронга берилиши керак.
12. Келишув ижросини назорат қилиш механизмини ташкил этиш.
13. Якуний келишув БМТ Хавфсизлик Кенгаши резолюцияси билан тасдиқланиши.
14. Эрон активларининг ярми блокдан чиқарилмагунча, нефть санкциялари тўхтатилмагунча ва денгиз блокадаси бекор қилинмагунча якуний музокаралар бошланмайди. Якуний келишувга фақат бойитилган уран, санкцияларни бекор қилиш ҳамда Эрон иқтисодиётини тиклаш дастури бўйича эришилади. Эроннинг ракета дастури ва қаршилик кўрсатиш гуруҳларини қўллаб-қувватлаши ҳақидаги масалалар кун тартибидан бутунлай чиқариб ташланади.
Эрон Ташқи ишлар вазирлиги вакилининг сўзларига кўра, лойиҳа матни ҳали Эроннинг тегишли идоралари томонидан кўриб чиқилиши ва якунига етказилиши керак.
