АҚШ Президенти Дональд Трамп 2026 йилги футбол бўйича Жаҳон чемпионати чипталарига эга бўлган саёҳатчилар учун виза тайинлаш жараёни тезлаштирилишини маълум қилди. Унинг айтишича, FIFA’нинг янги “PAS” тизими “узоқ кутиш вақтига эга бўлган чипта эгаларига”га элчихоналар ва консулликларда биринчи навбатда суҳбат қилиш имконини яратади. Бу ҳақда BBC хабар берди.
Давлат котиби Марко Рубионинг таъкидлашича, Жаҳон чемпионати чиптаси автоматик тарзда виза бермайди, аммо ариза топширган мухлислар одатда 6–8 ҳафта ичида суҳбат санасини олишлари мумкин бўлади. Ҳозирда айрим давлатларда АҚШ визаси учун кутиш муддати жуда узоқ. АҚШ Давлат департаменти маълумотига кўра, Колумбияда суҳбат тайинлаш учун 11 ой, Мехико шаҳрида эса 9,5 ой кутиш керак. Торонто шаҳрида (Канада фуқароси бўлмаганлар учун) кутиш муддати 14 ойни ташкил қилади. Агар бу муддатлар ўзгармаса, айрим мухлислар турнир тугаганидан кейин виза олишлари мумкин.
АҚШ Саёҳат уюшмаси янги тартибни олқишлаб, уни “хавфсизликни сақлаган ҳолда жараённи сезиларли енгиллаштирувчи қадам” деб баҳолади. Шу билан бирга, виза тақиқланган давлатлар чипталари эгаларига ушбу устуворлик татбиқ этилиши номаълумлигича қолмоқда. Жорий йилнинг июнь ойида Трамп 12 давлат фуқароларининг АҚШга киришини чекловчи фармонни имзолаган. Улар орасида Жаҳон чемпионатига чиққан Эрон ҳам бор. Фармонга кўра, спортчилар ва мураббийлар таркибига истисно берилади, бироқ оддий мухлислар учун чеклов кучда қолиши мумкин.
АҚШга саёҳат қилувчи барча футбол мухлислари виза олиши шарт эмас. Visa Waiver дастурига кирувчи давлатлар фуқаролари одатда 90 кунгача визасиз кириши мумкин.
Маълумот учун, турнир 2026 йилнинг июнь–июль ойларида АҚШ, Канада ва Мексикада ўтказилади. Аксарият ўйинлар АҚШда бўлиши кутилмоқда. FIFA президенти Жанни Инфантино Оқ уйда ўтказилган учрашувда АҚШга Жаҳон чемпионати учун 10 миллионгача меҳмон келиши мумкинлигини билдирди.
