Андижон вилоятининг Асака туманида 11 ёшли ўғлини рулга ўтқизиб, ўзи орқа ўриндиқда кетаётган ота ЙПХ ходимлари томонидан тўхтатилди. Бу ҳақда вилоят ИИБ ахборот хизмати хабар берди.
Маълум қилинишича, 2026 йилнинг 13 июль куни Асака туманида хизмат олиб бораётган ЙПХ ходимлари Spark русумли автомобилни тўхтатган. Текширув давомида автомашина рулида 4-синф ўқувчиси бўлган 11 ёшли бола борлиги, унинг ёш укаси олдинги ўриндиқда, отаси эса орқа ўриндиқда ўтиргани аниқланган.
Ҳолат юзасидан транспорт воситасини бошқариш ҳуқуқи бўлмаган шахсга топширгани учун отага нисбатан тегишли тартибда маъмурий баённома расмийлаштирилган.
Шунингдек, вилоятда ўтказилаётган рейд тадбирлари давомида ота-онасидан яширинча тунда автомобил олиб чиқиб ҳайдаган гувоҳномасиз йигит ҳамда спиртли ичимлик таъсирида рулга ўтирган ҳайдовчилар аниқланиб, чора кўрилган.
Қайд этилишича, рейдлар бошланганидан бери турли қоидабузарликлар сабаб 4000 дан ортиқ автомобил жарима майдонига қўйилган. Хусусан, транспорт воситасини бошқариш ҳуқуқидан маҳрум қилинган 150 дан зиёд шахснинг рулга ўтиргани, 400 дан ортиқ ҳайдовчилик гувоҳномасисиз машина бошқариш, 100 га яқин рухсатсиз ойна қорайтириш ҳамда 80 га яқин маст ҳолатда транспорт бошқариш ҳолатлари қайд этилган.
