Андижонда аёлни мажбуран автомобилга ўтказиб, овлоқ жойда сочини олиб ташлаган беш нафар шахс қўлга олинди. Ҳолат юзасидан вилоят Ички ишлар бошқармаси томонидан тезкор суриштирув ишлари олиб борилиб, жиноят иши қўзғатилди.
Аниқланишича, 1991 йилда Избоскан туманида туғилган, ҳозирда Андижон шаҳрида яшовчи аёл 1998 йилда туғилган бошқа бир аёлни турмуш ўртоғи билан ишқий муносабатда бўлганликда айблаб, ундан қасос олишни режалаштирган. 2025 йил 23 декабр куни у даволаниб ётган шифохонага 1995, 2004 ва 2001 йилларда туғилган таниш аёллар орқали 1998 йилда туғилган аёлни олиб келган.
Шифохонада жабрланувчига нисбатан турли ножўя ҳаракатлар содир этилиб, у таҳқирланган ва бу жараён видео тасвирга олинган. Кейинчалик 1991 йилда туғилган аёл ўзининг танишлари — 1999 ва 1998 йилларда туғилган икки нафар эркакни чақириб, аёлни овлоқ жойга олиб бориб, сочларини олиб ташлашни буюрган.
Натижада жабрланувчи аёл эркига хилоф равишда беш нафар шахс томонидан оқ рангли Gentra автомобилига мажбуран ўтказилиб, Андижон тумани Жевачи маҳалласи ҳудудидаги хилват жойга олиб борилган. У ерда 1999 йилда туғилган эркак томонидан унинг сочлари машинка ёрдамида олиб ташланган.
Мазкур жараён 1995 йилда туғилган аёл томонидан видеога олинган ва маълум вақт ўтгач ижтимоий тармоқларга жойланган. Ҳолат юзасидан Андижон шаҳри бўйича Ички ишлар органлари фаолиятини мувофиқлаштириш бошқармаси ҳузуридаги тергов бўлими томонидан Жиноят кодексининг 137-моддаси 2-қисми “в” банди билан жиноят иши қўзғатилган.
Гумонланувчи сифатида беш нафар шахс процессуал тартибда ушланган. Ҳозирда жиноят иши юзасидан дастлабки тергов ҳаракатлари олиб борилмоқда. Мазкур жиноят иши Андижон вилояти прокуратураси томонидан алоҳида назоратга олинган.
