Навоийда ноқонуний олтин қазиб олувчилар гуруҳи қўлга тушди. Бу ҳақда Давлат хавфсизлик хизмати хабар қилди.
Қайд этилишича, ноқонуний олтин савдосига ихтисослашган уюшган жиноий гуруҳ хорижий давлат фуқароларини жалб қилган ҳолда солиқ, геология, экология ва атроф-муҳитни муҳофаза қилиш соҳасидаги қатор қонунчилик талабларига зид равишда фаолият юритган. Уларга Кармана туманидаги спортга ихтисослашган МЧЖ раҳбари бошчилик қилган.
Қонунбузарлардан 17,2 кило олтин ва кумуш қоришмаси, 20 кило ярим тайёр олтин маҳсулоти, таркибида олтин зарралари бўлган 250 кило бойитилган кўмир ҳамда 280 тоннадан ортиқ қум ва рудалар, 230 литр махсус кимёвий воситалар, шунингдек, олтинни ажратиб олишга мўлжалланган лаборатория ва жиҳозлари, махсус идишлар, газ баллонлар ҳамда бошқа асбоб-ускуналар ашёвий далил сифатида расмийлаштириб олинди.
Гуруҳ томонидан олтинни ажратиб олиш учун сунъий яратилган 4 та ҳовуз кимёвий воситалар билан тўлдирилиб, 1 гектар ер саноат ишлаб чиқариш майдонига айлантирилган.
Ҳозирда ашёвий далиллар экспертизага юборилиб, терговга қадар текширув ҳаракатлари олиб борилмоқда.
