Президент Шавкат Мирзиёев 9 февраль куни Навоий халқаро аэропорти фаолиятини самарадорлигини ошириш чора-тадбирлари тўғрисидаги қарорни имзолади.
Ушбу аэропортни ҳаво, темир йўл ва ерусти транспорти йўналишларини бирлаштирувчи халқаро мултимодал логистика хабига айлантириш орқали экспорт ва транзит салоҳиятини ошириш, шунингдек, маҳаллий ва хорижий авиаташувчилар учун қулай шароитларни яратиш мақсад қилинган.
Ҳужжатга кўра, Навоий халқаро аэропорти Uzbekistan Airports’нинг марказлашган бошқарувидан ажратилиб, лойиҳавий бошқарув тамойиллари асосида ривожлантирилади. Бунинг натижасида қуйидаги натижаларга эришиш режалаштирилган:
- 2030 йилга келиб аэропортда амалга оширилаётган парвозлар сонини 2,3 баробарга ошириб, йилига 7 мингтага етказиш;
- йўловчи ташиш ҳажмини йилига 150 минг нафарга ҳамда юк ташиш ҳажмини 45 минг тоннага етказиш;
- 2026 йилда Бирлашган Араб Амирликлари, Туркия ва Хитойдан почта-курьерлик ва тижорат юкларини етказиб бериш бўйича авиақатновлар сонини ҳафтасига 3 тага етказиш.
Аэропорт ҳудудида 2028 йил якунига қадар ҳаво кемаларига техник хизмат кўрсатиш, таъмирлаш ва бўяш бўйича алоҳида марказ ташкил этиш, амалдаги ёнилғи-мойлаш материаллари омбори ва юк терминали инфратузилмасини модернизация қилиш ҳамда мавжуд қувватлардан тўлиқ фойдаланиш шартидан келиб чиққан ҳолда сиғими 10 минг тоннали резервуарларни ҳамда 16 минг метр квадратли янги юк терминалини барпо қилиш кўзда тутилган.
“Порто франко” эркин божхона зонаси ташкил этилади
Ҳужжатда белгиланишича, “Навоий халқаро аэропорти” МЧЖ ҳудудида илғор хорижий тажриба асосида эркин иқтисодий зона ҳамда “порто франко” режими асосида фаолият юритувчи эркин божхона зонаси ташкил этилади. “Порто франко” эркин божхона зонасида имтиёзлар асосида товарларни бож тўламасдан киритиш, сақлаш ва қайта ишлаш, импорт-экспорт операциялари, ижара, трейдинг, ишлаб чиқариш, консалтинг, молия-аудит, брокерлик, банк, турли хил маиший, кейтеринг, логистика, форвардинг-экспедиторлик, тракинг, ҳаво кемаларига техник ва ерусти хизматларини кўрсатиш ҳамда лизинг операциялари хизматларини кўрсатиш ва ушбу турдаги хизматлар билан шуғулланувчи компаниялар ташкил этилишига рухсат берилади.
Бунда юқорида қайд этилган хизматлар кўрсатиш ва компания фаолиятини йўлга қўйиш Навоий халқаро аэропорти эркин иқтисодий зонаси дирексияси томонидан амалга оширилади.
“Порто франко” эркин божхона зонаси ҳудудида халқаро ҳуқуқий ва техник меъёрларга мувофиқ барча хорижий ҳаво кемалари ва уларнинг алоҳида агрегатларини таъмирлаш учун зарур бўлган авиатехника эҳтиёт қисмлари эркин алмаштирилади.
Бундан ташқари, халқаро автотранспорт воситалари (ТИР) учун замонавий тўхташ жойи ва сервис инфратузилмаси (ТИР Парк Навоий Аирпорт) ташкил этилади.
Аэропортга маҳаллий ва хорижий авиакомпаниялар билан йўловчи ва юк ташиш, транзит ҳамда техник қўнишлар бўйича мустақил музокаралар олиб бориш ҳамда шартномалар тузиш ҳуқуқи берилади.
“Навоий халқаро аэропорти” МЧЖ 2029 йил 1 январга қадар молиявий зарар кўрган тақдирда, ушбу маблағ Uzbekistan Airports АЖнинг давлат улуши бўйича бюджетга тўланадиган дивидендлари ҳисобидан қоплаб борилади. Бунда ушбу маблағлар айланма маблағлар сифатида эътироф этилмайди ва иқтисодий жиҳатдан ўзини оқлайдиган бепул товар берилишига тенглаштирилади.
