“Манчестер Сити” бош мураббийи Пеп Гвардиола Англия Премьер-лигасида апрель ойининг энг яхши мураббийи деб топилди. Бу ҳақда лиганинг расмий сайтида хабар берилди.
Испаниялик мутахассис бошқарувидаги “Манчестер Сити” апрель ойида ўтказган учта учрашувнинг барчасида ғалаба қозонди. Жумладан, жамоа чемпионлик учун асосий рақобатчиси бўлган “Арсенал”ни 2:1 ҳисобида мағлуб этди. Шунингдек, “Челси” 3:0, “Бёрнли” эса 1:0 ҳисобида таслим этилди.
Пеп Гвардиола ушбу мукофотни жорий мавсумда иккинчи, фаолияти давомида эса 13-марта қўлга киритди. Бу кўрсаткич бўйича ундан фақат Арсен Венгер (15 марта) ва Алекс Фергюсон (27 марта) олдинда турибди.
“Шаҳарликлар” устози ушбу мукофотни қўлга киритишда Нуну Эшпириту Санту (“Вест Хэм”), Даниель Фарке (“Лидс”), Фабиан Хюрцелер (“Брайтон”), Андони Ираола (“Борнмут”), Витор Перейра (“Ноттингем Форест”), Арне Слот (“Ливерпуль”) ларни ортда қолдирди.
Шунингдек, “Ноттингем Форест” сардори Морган Гиббс-Уайт апрель ойининг энг яхши футболчиси деб топилди. Ярим ҳимоячи ой давомида учта ўйинда тўртта гол уриб, битта голли узатмани амалга оширди.
У “Бёрнли”га қарши 4:1 ҳисобидаги ўйинда хет-трик қайд этди. Бундан ташқари, “Сандерленд” устидан 5:0 ҳисобида қозонилган ғалабада ҳам бир гол ва бир ассист муаллифига айланди.
