Apple компанияси Хитой бозори учун махсус сунъий интеллектга асосланган тил моделини ишлаб чиқди. Бу ҳақда вазиятдан хабардор учта манбага таяниб Reuters хабар берди.
Янги модел Alibaba Group компанияси билан ҳамкорликда яратилган ва унинг кўмагида ўқитилган. Аввалроқ Apple Хитойда учинчи томон моделларидан фойдаланишни режалаштираётгани айтилган эди. Махсус модел яратилгани ҳақида эса хабар берилмаганди.
Хитойда OpenAI’нинг ChatGPT ва Anthropis’нинг Claude каби АҚШ моделлари тақиқланган. Шу сабабли Apple маҳаллий ҳамкорлар технологиясидан фойдаланишга мажбур бўлмоқда. Apple ва Alibaba бу борада изоҳ беришдан бош тортди.
Кутилишича, Apple Intelligence сунъий интеллект воситалар тўплами iOS операцион тизими янгилангач, яқин ойларда Хитойда ишга тушади. Ўз моделига эга бўлиш Apple’га Хитой бозорида сунъий интеллект имкониятларини яхшироқ назорат қилиш имконини беради. Шунингдек, у Хитойда ўз СИ моделини таклиф қилиш учун Пекиндан рухсат олган биринчи хорижий компанияга айланади.
Июль ойида Хитой киберҳудуд маъмурияти Apple’нинг сунъий интеллект хизматини рўйхатдан ўтказган ва тартибга солиш ғовларини олиб ташлаган эди. Аввалроқ тарқалган хабарларга кўра, Хитойдаги Apple қурилмаларига Alibaba’нинг Qwen модели ҳамда Baidu технологиялари интеграция қилинади.
Компания ўтган ҳафтада Хитойдаги Маc фойдаланувчилари Qwen моделини Siri ва Writing Tools функциясига қандай улаши ҳақида йўриқнома эълон қилди. Бироқ кейинчалик ушбу йўриқнома сабабсиз ўчириб ташланди.
Alibaba раиси Жо Цай 2025 йил февраль ойида Дубайдаги саммитда Apple Хитойдаги телефонлари учун уларнинг технологиясини танлаганини тасдиқлаган эди. Бироқ хизматни ишга тушириш маҳаллий талабларга мослаштириш жараёни сабаб бир оз кечикди.
