Польша ҳарбий-ҳаво кучлари қирувчи самолётлари Болтиқ денгизи узра мамлакат ҳаво ҳудудига яқин масофада учиб ўтаётган Россиянинг разведка самолётини тутиб олди. Бу ҳақда The Independent хабар берди.
Польша армиясининг 25 декабрь кунги баёнотига кўра, Болтиқ денгизининг халқаро сувлари устида навбатчилик қилаётган қирувчи самолётлар ҳаво чегаралари яқинида Россия разведка самолётини аниқлаган. Польша учувчилари объектни визуал идентификация қилиб, уни ўз жавобарлик ҳудудидан кузатиб қўйган.
Мазкур ҳодиса НАТОнинг шарқий қанотидаги давлатлар ҳар қандай таҳдидга юқори шайлик ҳолатида турган бир вақтда юз берди. Сентябрь ойида ҳам шунга ўхшаш ҳолат содир бўлиб, Россиянинг 20 дан ортиқ дрони Польша ҳаво ҳудудига кирган эди. Шундан бир неча кун ўтиб, Россия ҳарбий самолётлари Эстония ҳаво ҳудудини 12 дақиқа давомида бузиб турган эди.
Беларусьдан учиб ўтган “контрабанда шарлари”
Шунингдек, Польша ҳарбийлари 24 декабрь куни тунда Беларусьдан мамлакат ҳаво ҳудудига номаълум объектлар кирганини қайд этди.
“Батафсил таҳлиллардан сўнг, ушбу объектлар шамол йўналиши ва тезлиги бўйлаб ҳаракатланаётган контрабандачиларнинг ҳаво шарлари экани аниқланди”, дейилади армия хабарида.
Хавфсизликни таъминлаш мақсадида Польшанинг шимоли-шарқидаги, Беларусь билан чегарадош бўлган Подлясе ҳудуди устидаги ҳаво бўшлиғининг бир қисми фуқаролик авиацияси учун вақтинча ёпилди.
