Қатарнинг Рас Лаффан саноат зонасидаги газни қайта ишлаш заводида портлаш юз берди. Оқибатда 54 киши жароҳатланди, 18 киши бедарак йўқолди. Бу ҳақда Reuters хабар берди.
QatarEnergy баёнотига кўра, ҳодиса 21 июнь куни тунда операцияларни ишга тушириш жараёнида содир бўлган. Бу Барзан маҳаллий газ таъминоти иншоотида портлаш ва ёнғинни келтириб чиқарган. Ёнғинни бартараф этиш учун фавқулодда вазиятлар гуруҳлари сафарбар этилган. Ҳозирда вазият назоратга олингани таъкидланмоқда.
Қатар Ички ишлар вазирлиги 54 киши жароҳатлангани, 18 киши эса бедарак йўқолгани ва қидирилаётганини маълум қилди. Вазирлик портлашни “техник авария” дея изоҳлади ва жамоат хавфсизлигига таҳдид солувчи газ сизиб чиқиши кузатилмаганини билдирди. Қатар халқаро қидирув-қутқарув гуруҳи ва фуқаро муҳофазаси гуруҳлари бедарак йўқолганларни ҳамкорликда қидирмоқда.
QatarEnergy портлаш ички бозорга газ етказиб берувчи ушбу заводга бирор зарар етказган-етказмаганига аниқлик киритмади. Гувоҳлардан бири Reuters агентлигига Рас Лаффан иншоотидан жанубда жойлашган пойтахт Доҳа шаҳрида ҳам кучли гумбурлаш овози эшитилганини маълум қилган.
Маълумот ўрнида, уруш даврида Эрон Қатарнинг фуқаролик инфратузилмаларини ва Рас Лаффандаги ҳаётий муҳим бўлган суюлтирилган табиий газ (СТГ/LNG) ишлаб чиқариш заводини нишонга олганди. Ушбу ҳужум Қатарнинг СТГ экспорт салоҳиятининг қарийб 17 фоизини йўқ қилди. Мамлакат Эрон зарбаларидан кейин, 2 март куни СТГ ишлаб чиқаришни тўхтатганди.
Урушдан олдин дунёдаги СТГ савдосининг қарийб 20 фоизи Ҳормуз бўғози орқали ўтган ва бу асосан Қатарга тегишли бўлган. Эрон ушбу бўғозни амалда ёпиб қўйиши оқибатида Қатарнинг СТГ экспорт қилиш имконияти бутунлай йўқолди.
