Хитойда бир сутка ичида сунъий йўлдошлар билан амалга оширилган икки ракета учирилиши ҳам муваффақиятсизлик билан якунланди. Бу ҳақда бугун, 17 январь куни “China Daily” хабар берди.
Нашрнинг ёзишича, биринчи ҳолатда учириш ишларини Galactic Energy хусусий компанияси амалга оширган. Ceres-2 ракетаси ҳавога кўтарилган, бироқ стартдан кўп ўтмай ҳалокатга учраб, тўлиқ йўқ бўлиб кетган. Қайд этилишича, бу ушбу моделдаги ракетанинг илк парвози бўлиб, унинг ёрдамида орбитага олтита сунъий йўлдош чиқариш режалаштирилган.
Иккинчи ҳолатда эса Shijian 32 сунъий йўлдошини олиб кетаётган “Чанчжэн-3Б” (“Буюк юриш”) ракетаси қулаган. Ҳодисаларнинг сабаблари ва етказилган эҳтимолий зарар ҳақида ҳали расмий маълумот берилмади.
