АҚШ Венесуэладаги 65 млрд баррелдан ортиқ тасдиқланган нефть захиралари устидан назоратни қўлга киритиш бўйича келишувга эришди. Бу ҳақда АҚШ президенти Truth Social’даги саҳифасида маълум қилди.
Трамп келишувни жаҳон тарихидаги энг йирик нефть битими деб атади. Унинг сўзларига кўра, АҚШ Венесуэладаги мазкур захиралар устидан назорат пакетига эга бўлади.
Келишув давлат котиби Марко Рубио ва Пентагон раҳбари Пит Ҳегсет томонидан Венесуэла муваққат президенти Делси Родригес ҳамда хусусий компаниялар иштирокида ишлаб чиқилган. Трамп битим америкалик солиқ тўловчиларга харажат келтирмаслигини билдирган.
Президентнинг таъкидлашича, келишув АҚШ назоратидаги нефть захиралари ҳажмини икки баравар кўпроққа оширади. Шунингдек, нефть таклифининг кўпайиши узоқ муддатда бензин нархларининг пасайишига хизмат қилиши кутилмоқда.
Делси Родригес келишув доирасида 17 та стратегик нефть кони ўзлаштирилишини маълум қилган. Улардаги тасдиқланган захиралар 65 млрд баррелдан ошади. Лойиҳаларга 100 млрд доллардан ортиқ инвестиция киритилиши ва минглаб иш ўринлари яратилиши режалаштирилган.
АҚШ давлат котиби Марко Рубио ҳам битим натижасида Венесуэлага қарийб 100 млрд доллар хусусий инвестиция кириб келишини айтди.
Ҳозирча келишувда қайси компаниялар қатнашиши ва АҚШ нефть захиралари устидан назоратни айнан қандай амалга ошириши ҳақида тўлиқ маълумот берилмаган.
Венесуэла дунёдаги энг катта тасдиқланган нефть захираларига эга. Уларнинг умумий ҳажми 300 млрд баррелдан ошади.
