Россияда эҳтимолий маймунчечак билан боғлиқ бўлган ҳолатлар сабабли эпидемиологик суриштирув бошланди. Беш киши шифохонага ётқизилган ва шифокорлар назоратида бўлиб турибди. Бу ҳақда РБК хабар берди.
Қайд этилишича, маймунчечак гумон қилингани сабабли Россиянинг Санкт-Петербург шаҳрида беш киши шифохонага ётқизилган. Мутахассислар юқтиришнинг эҳтимолий ҳолатларини ва беморлар билан мулоқотда бўлган бўлиши мумкин бўлган шахсларни аниқламоқда.
“Эпидемиологик суриштирув давомида мулоқотда бўлган шахсларни аниқлаш бўйича ишлар олиб борилмоқда. Беш киши шифохонага ётқизилган ва тиббий назоратда бўлиб турибди. Дезинфекция ишларини ўтказиш бўйича кўрсатма берилди”, дейилади хабарда.
Бошқарманинг қўшимча қилишича, мутахассислар зудлик билан санитария-эпидемиологик суриштирувни бошлаган ва эпидемияга қарши тўлиқ чора-тадбирлар мажмуини ташкил этган.
Диагностика учун Роспотребнадзор томонидан ишлаб чиқилган ва рўйхатдан ўтказилган, вирусни қисқа муддатда аниқлаш имконини берувчи тест тизимларидан фойдаланилмоқда. Суриштирув давом этмоқда, вазият идора назоратида.
Аввалроқ, 15 октябрь куни бошқа ҳолатлар Москва вилоятида қайд этилгани хабар қилинган. У ерда маймунчечак юқтирган деб тахмин қилинган шахс билан мулоқотда бўлган беш киши профилактика мақсадида шифохонага ётқизилган. Ҳудудий Соғлиқни сақлаш вазирлигининг маълум қилишича, уларда касаллик симптомлари бўлмаган, аҳволи қониқарли деб баҳоланган. Беморлардан таҳлиллар олиниб, тиббий назорат ўрнатилган.
BAZA маълумотларига кўра, вирусли касаллик симптомлари билан шифохонага беш киши олиб борилган: 22 ёшдан 35 ёшгача бўлган уч эркак ва икки аёл. Улар бир хонадонда яшашган. Нашрнинг ёзишича, улар 12 октябрь куни инфекция манбаи билан мулоқотда бўлган бўлиши мумкин.
“Mash” маълумотига кўра, беморлар 21 кунлик карантинга юборилган. Шу билан бирга, канал эҳтимолий инфекция манбаи билан мулоқот 10 октябрь куни содир бўлганини даъво қилмоқда.
Маълумот учун, маймунчечак – бу юқумли касаллик бўлиб, зарарланган одам билан яқин мулоқотда бўлганда, ифлосланган буюмлар орқали, шунингдек, касалланган ҳайвонлардан ўтади. Симптомлар зарарлангандан кейин 1–21 кун ичида пайдо бўлади. Улар орасида оғриқли тошмалар, иситма, лимфа тугунларининг катталашиши, бош оғриғи, мушак оғриқлари ва кучли ҳолсизлик бор. Касаллик оғир кечиши ва асоратлар келтириб чиқариши мумкин.
Эслатиб ўтамиз, олдинроқ Иркутскдаги ўлатга қарши институтда ишлаган 28 ёшли лаборант Дарья Шипилованинг ўлими ҳақида маълум бўлган эди. “Роспотребнадзор” буни пневмония билан, бир қатор манбалар эса ўлат билан боғлади. Марҳума билан алоқада бўлган 200 га яқин киши изоляция қилинган эди. Шелеховдаги шифохона ва “Люди Байкала” маълумотларига кўра, Иркутскдаги яна бешта тиббиёт муассасаси карантинга ёпилган эди.
Бундан ташқари, Шелеховдаги Иркутск алюминий заводида ниқоб режими жорий этилганди. “Люди Байкала”нинг соғлиқни сақлаш соҳасидаги манбаси шифокорлар “аллақачон ўлат ҳақида очиқчасига гапиришаётганини”, аммо расмий ҳужжатларда касаллик тилга олинмаганини таъкидлаган эди. Иркутскнинг карантинга ёпилган туғуруқхонасида ётган аёллардан бирининг сўзларига кўра, шифокорлар тўловли ҳамкорликдаги туғуруқ шартномасига қарамай, ўлатни важ қилиб, унинг эрини палатага киритишмаган.
Кобзев Бутунжаҳон соғлиқни сақлаш ташкилоти (ЖССТ) фуқаролар саломатлиги учун хавфлар йўқлигини “очиқчасига тасдиқлаганини” айтди. Унинг маълумотларига кўра, Иркутск ва Шелеховдаги санитария-эпидемиологик вазият “барқарор”.
Шу билан бирга, ЖССТ раҳбари Тедрос Аданом Гебреисус ташкилот ҳалигача Иркутск вилоятидаги вазият бўйича “тўлиқ тасаввур”га эга эмаслигини билдирди. Унинг сўзларига кўра, шу сабабли ЖССТ “хавфларни кенг кўламли баҳолай олмайди”. Гебреисус “сабаби аниқланмаган пневмонияга чалинган иккинчи ходим” ҳақидаги тасдиқланмаган хабарлар бўйича Россия Федерациясидан қўшимча изоҳлар кутаётганини таъкидлади.
