Эрон АҚШ ва Исроил билан уруш фонида душманларга маълумот узатишда айбланган 500 кишини қўлга олди. Бу ҳақда Эрон полицияси бошлиғи Аҳмадризо Раданга таяниб Reuters хабар берди.
Раданнинг сўзларига кўра, ушбу ҳолатларнинг ярми жиддий ҳодисалар билан боғлиқ. Улар орасида зарба бериладиган нишонлар ҳақида маълумот берганлар ва ҳужумга учраган жойларни суратга олиб, юборган шахслар бор. Аҳмадризо Радан ҳибсга олишлар қачон амалга оширилганига аниқлик киритмади.
Бундан аввал Эроннинг шимоли-ғарбида 20 киши ҳарбий ва хавфсизлик объектлари жойлашуви ҳақида Исроилга маълумот юборганликда гумонланиб ушланган эди. Мамлакатнинг шимоли-шарқида, ҳаво зарбалари деярли етиб бормаган ҳудудда эса 10 киши қўлга олинган. Улардан айримлари муҳим объектлар ва иқтисодий инфратузилма ҳақида маълумот тўплаганликда айбланмоқда.
Исроил ҳарбий стратегияси ҳақида маълумот берган манбага кўра, Исроил қуруқликда фаолият юритаётган информаторлар кўрсатмаларига асосланиб хавфсизлик пунктларини нишонга ола бошлаган. Бу Эрон ҳудудига ҳужумларнинг янги босқичи сифатида баҳоланмоқда.
