Франциялик ўғрилар Канберрада ҳашаматли буюмлар сақланадиган уйни сунъий интеллект ёрдамида топди. Бу ҳақда ABC News хабар бермоқда.
Ўғрилик 2025 йилнинг октябрь ойида содир бўлган. Ўшанда тўрт нафар босқинчи деразани синдириб, уйдан дизайнерлик тақинчоқлари, сумкалар ва соатларни ўғирлаб кетган. Орадан бир неча кун ўтгач, улар Сидней шаҳридаги фастфуд ресторанида қўлга олинган.
Айблов эълон қилинган шахслар Франция фуқаролари бўлиб чиққан. Улар айбини тўлиқ тан олган, бироқ ҳимоячилари етказилган зарар миқдорига эътироз билдирмоқда.
Декабрь ойида, айбловлар эълон қилинганидан сўнг ўғирланган буюмларнинг бир қисми қисқа муддатли ижарага берилган уйдан топилди. Йўқолган буюмлар орасида эгалари тахминан 5 миллион долларга баҳолаган Richard Mille RM88 Smiley соати ҳам бор.
Олий судда ўғирланган буюмларнинг қиймати 10 миллион доллардан 2 миллион долларгача камайтирилди.
“Айблов (қайтарилмаган) буюмларнинг ҳақиқийлигини ҳар қандай асосли шубҳаларсиз исботлай олмаяпти. Жабрланувчилар бу буюмларнинг асл эканини тасдиқловчи квитансиялар, харидни тасдиқловчи ҳужжат, транзаксия ёзувлари ёки сертификатлар каби ҳеч қандай далил тақдим эта олмади”, дейилади баёнотда.
Иш ҳужжатларига кўра, жабрланувчи ижтимоий тармоқларга ўғирланган буюмлар акс этган суратларни жойлаган.
Жойлашувни аниқлаш учун ўғрилар сунъий интеллектдан фойдаланган.
Нейротармоқ гуллаётган олча дарахти Канберрада жойлашганини аниқлашга ёрдам берган. Ўғрилар эса ChatGPT’дан фойдаланган ва у ҳовуз ҳамда теннис корти акс этган орқа ҳовли сурати орқали манзилни топган.
