Эрон футбол федерацияси президенти Меҳди Тож Эрон миллий терма жамоаси АҚШни бойкот қилиши, бироқ Жаҳон чемпионатида иштирок этишини маълум қилди. Бу ҳақда Тож терма жамоанинг Туркиядаги йиғини олдидан журналистларга берган интервьюсида сўз очди.
“Миллий терма жамоа ҳозир Туркияда ўқув-машғулот йиғинида қатнашмоқда ва бу ерда иккита ўртоқлик ўйини ўтказамиз. Биз Американи бойкот қиламиз, аммо Жаҳон чемпионатини бойкот қилмаймиз”, дейди у.
Эрон терма жамоаси гуруҳ босқичида Бельгия, Миср ва Янги Зеландия билан бир гуруҳдан жой олган. Режага кўра, ушбу учрашувларнинг барчаси АҚШ ҳудудида ўтказилиши белгиланган.
Жорий йилнинг 17 март куни Меҳди Тож Эрон ўйинларини АҚШдан Мексикага кўчириш бўйича музокаралар олиб борилаётганини ҳам маълум қилган эди. Кейинчалик Мексика президенти Клаудия Шейнбаум Эрон учрашувларини ўз мамлакатида ўтказишга тайёр эканини билдирган.
Бироқ FIFA ўйинлар жадвалини ўзгартирмаслигини маълум қилди. Ташкилот барча жамоалар 2025 йил 6 декабрь куни тасдиқланган тақвим асосида мусобақада қатнашишини кутмоқда.
Маълумот учун, 2026 йилги Жаҳон чемпионати 11 июндан 19 июлгача АҚШ, Канада ва Мексикада бўлиб ўтади.
