Бразилия терма жамоаси ва “Сантос” ҳужумчиси Неймар 2026 йилги Жаҳон чемпионатига тайёргарлик бошланиши арафасида яна жароҳат олди. Бу ҳақда “Globo” нашри хабар берди.
Маълум бўлишича, футболчининг ўнг болдир мушакларида шишиш аниқланган.
Манбага кўра, жароҳат жиддий эмас, аммо футболчи даволаниши ва бир муддат жисмоний юкламаларни чеклаши керак бўлади. 34 ёшли ҳужумчи ҳозирда “Сантос”нинг машғулот марказида шахсий тиббий гуруҳи назорати остида тикланмоқда. Шунингдек, Бразилия футбол конфедерацияси мутахассислари ҳам Неймарнинг ҳолатини кузатиб бормоқда.
Ҳужумчи жорий йилнинг 27 майига қадар тўлиқ машғулотларга қайтиши ва Жаҳон чемпионати бошланишидан олдин миллий терма жамоага қўшилиши кутилмоқда.
