Халқаро бокс ассоциацияси (IBA) россиялик боксчи Всеволод Шумковни 2025 йилда Дубайда бўлиб ўтган Жаҳон чемпионати финалида рақибининг қулоғини тишлагани учун жазолади. Бу ҳақда Россия бокс федерацияси (РБФ) бош котиби Александр Беспутин маълум қилди.
Ҳодиса 60 кг вазн тоифасидаги ҳал қилувчи жангда содир бўлган. Финал жангининг учинчи раунди охирида Шумков Абдумалик Халоковни тишлаб олган.
“Федерация ва Всеволод Шумковга Абдумалик Халоковни тишлагани учун санкциялар қўлланилади”, дейди Беспутин.
Шунга қарамай, Шумков ўзбекистонлик боксчи, Олимпия чемпиони Абдумалик Халоковни мағлуб этиб, жаҳон чемпионати олтин медалини қўлга киритди. Жангдан сўнг Ўзбекистон терма жамоаси бош мураббийи Раҳматжон Рўзиохунов Шумковнинг ҳаракатларини танқид қилиб, мамлакат бокс федерацияси расмий апелляция беришини таъкидлаган эди.
