Бугун, 18 июнь куни Ўзбекистон миллий терма жамоаси ўз тарихидаги илк Жаҳон чемпионати учрашувида майдонга тушди. Унда Фабио Каннаваро шогирдлари Колумбияга қарши баҳс олиб бориб, 1:3 ҳисобида мағлубиятга учради.
Мексикадаги машҳур “Ацтека” стадионида бўлиб ўтган учрашувда ҳисоб 41-дақиқада очилди. Колумбия терма жамоаси ҳимоячиси Даниэль Муньос жанубий америкаликларни олдинга олиб чиқди.
Иккинчи бўлимнинг 60-дақиқасида Аббосбек Файзуллаев Ўзбекистон футболи тарихидан ўрин олди. Ярим ҳимоячи Колумбия дарвозасини ишғол қилиб, миллий терма жамоанинг Жаҳон чемпионатлари тарихидаги илк голига муаллифлик қилди ва ҳисобни тенглаштирди.
Бироқ орадан олти дақиқа ўтиб, Луис Диас Колумбиянинг иккинчи голини киритди. Учрашувнинг асосий вақтига қўшиб берилган 90+8-дақиқада Хаминтон Кампас Колумбиянинг 3-голини киритди. Қолган вақт давомида ҳисоб ўзгармади ва баҳс Колумбиянинг 3:1 ҳисобидаги ғалабаси билан якунланди.
Гуруҳнинг иккинчи учрашувида Португалия ва Конго Демократик Республикаси терма жамоалари 1:1 ҳисобида дуранг ўйнади.
Шу тариқа, биринчи турдан сўнг Колумбия 3 очко билан “К” гуруҳида якка пешқадамга айланди. Португалия ва Конго ДР ҳисобида бир очкодан мавжуд. Ўзбекистон эса очкосиз қолди.
Эндиликда Ўзбекистон миллий терма жамоаси гуруҳ босқичидаги навбатдаги учрашувини жорий йилнинг 23 июнь куни Хьюстон шаҳрида Португалияга қарши ўтказади. Каннаваро шогирдлари учинчи турда эса 27 июнь куни Атланта шаҳрида Конго Демократик Республикаси билан баҳс олиб боради.
