Россия Давлат думаси мудофаа қўмитаси раиси биринчи ўринбосари Алексей Журавлёв Венесуэлага қурол етказиб берилаётганини айтди. У “Орешник” баллистик ракетасини топширишни ҳам истисно этмади. Бу ҳақда “Gazeta.ru” хабар берди.
Бизга дўст бўлган мамлакатни “Орешник” каби янги ишланмалар билан таъминлаш учун ҳеч қандай тўсиқ кўрмаяпман, деди Журавлёв.
У Россия Венесуэланинг асосий ҳарбий-техник ҳамкори эканини, “ўқотар қуролдан тортиб авиациягача барча турдаги қуролларни етказиб беришини” таъкидлади. Экспорт ҳажми ва аниқ номлар махфий сақланади. Шу сабабли Журавлёвнинг айтишича, “америкаликларни сюрпризлар кутмоқда”.
Россиянинг “Су-30МК2” қирувчи самолётлари Венесуэла ҳарбий-ҳаво кучларининг асосини ташкил этади.
Бу эса мамлакатни “минтақадаги энг қудратли авиация давлатларидан бири”га айлантиради, деди мулозим.
Унинг сўзларига кўра, Лотин Америкаси мамлакатига “С-300ВМ” (“Антей-2500”) зенит-ракета дивизионлари, шунингдек, яқинда Ил-76 самолёти орқали “Пансир-С1” ва “Бук-М2Э” ҳаво мудофаа тизимлари ҳам етказиб берилган.
Халқаро мажбуриятлар Москвани Каракасга замонавий қуроллар, жумладан, “Калибр” мажмуаларини етказиб беришда чекламайди, деди у.
