Қирғизистон ва Ўзбекистон чегарасидаги учта назорат ўтказиш пункти тун-у кун ишлашни бошлади. Бу ҳақда Қирғизистон Давлат чегара хизматига таяниб “АКИпресс” хабар берди.
Маълум қилинишича, Боткен вилоятидаги мазкур пунктлар 20 майдан бошлаб бир сутка давомида узлуксиз ишлайди. Гап қуйидаги ўтказиш пунктлари ҳақида кетмоқда:
- “Қадамжой — автойўл”;
- “Чашма — автойўл»;
- “Оқ-Қия — автойўл”.
Иш режимининг ўзгартирилиши сайёҳлик мавсуми даврида чегарани кесиб ўтаётган фуқаролар учун қулай шарт-шароитлар яратишга қаратилган. Шу билан бирга, фақат Қирғизистон ва Ўзбекистон фуқаролари ушбу назорат-ўтказиш пунктларидан ўта олади. 24 соатлик иш тартиби 2026 йил 1 октябргача амал қилади.
