Португалия терма жамоаси ва Саудия Арабистонининг “Ал-Наср” клуби ҳужумчиси Криштиану Роналду сўнгги 12 ой ичида дунё спортчилари орасида энг кўп даромад олган спортчи бўлди. Бу ҳақда “Forbes” хабар берди.
Роналду “Ал-Наср” билан тузган шартномаси орқали 235 миллион доллар, турли реклама шартномаларидан эса, яна 65 миллион доллар ишлаб топди. Шу тариқа унинг умумий даромади 300 миллион долларга етди. Бу натижа америкалик боксчи Флойд Мейвезернинг 2015 йилдаги рекордига тенглашди. “Forbes” 1990 йилдан буён спортчилар даромади рейтингини эълон қилиб келади.
Иккинчи ўринни мексикалик боксчи Сауль Альварес эгаллади. Унинг даромади – 170 миллион доллар (160+10)ни ташкил этди. Учинчи ўрин эса, “Интер Майами” ҳужумчиси Лионель Мессига насиб этди. Аргентиналик футболчининг умумий даромади – 140 миллион доллар (70+70) бўлди.
Қолган ўринлар қуйидагича:
- Леброн Жеймс (АҚШ, “Лос-Анжелес Лейкерс”) – 137,8 миллион доллар (52,8+85);
- Сёҳэй Отани (Япония, “Лос-Анжелес Дожерс”) – 127,6 миллион доллар (2,6+125);
- Стивен Карри (АҚШ, “Голден Стэйт Уорриорз”) – 124,7 миллион доллар (59,7+65);
- Жон Рам (Испания, гольф) – 107 миллион доллар (97+10);
- Карим Бензема (Франция, “Ал-Иттиҳод”) – 104 миллион доллар (100+4);
- Кевин Дюрант (АҚШ, “Хьюстон Рокетс”) – 103,8 миллион доллар (54,8+49);
- Льюис Хэмилтон (Буюк Британия, “Феррари”) – 100 миллион доллар (70+30).
Маълумот учун, топ-10 спортчиларининг умумий даромади 1,4 миллиард долларни ташкил қилди. Криштиану Роналду эса, кетма-кет тўртинчи йил “Forbes” рейтингида биринчи ўринни эгаллаб келмоқда.
