Самарқандда банклардан бирига бостириб кириб, ўзида портловчи модда борлигини айтган ҳолда пул талаб қилган шахс қўлга олинди. Бу ҳақда Ички ишлар вазирлиги ҳузуридаги Қўриқлаш департаменти хабар берди.
Қайд этилишича, жорий йилнинг 13 июль куни соат 17:00 атрофида Самарқанд вилояти Қўриқлаш хизмати бошқарув марказига Мирзо Улуғбек кўчасида жойлашган банклардан бирида хавфли вазият юзага келгани ҳақида хабар келиб тушган.
Воқеа жойига етиб борган тезкор ҳаракатланувчи гуруҳ ходимлари қишки кийим кийган, юзини ниқоб билан яширган ва қора сумка кўтарган шахс банк ичида ойналарни синдириб, ўзида портловчи модда борлигини таъкидлаган ҳолда пул талаб қилаётганини аниқлаган.
Шундан сўнг воқеа жойига қўшимча тезкор гуруҳлар, ички ишлар органлари ҳамда тез тиббий ёрдам ходимлари жалб этилган. Қўриқлаш хизмати ходимлари гумонланувчи билан музокаралар олиб борган.
Маълум қилинишича, музокаралардан сўнг тартиббузар ўз ихтиёри билан таслим бўлган ва ички ишлар органлари ходимларига топширилган. Ҳодиса вақтида банк ходимлари ва мижозларга ҳеч қандай зарар етмаган.
Дастлабки маълумотларга кўра, гумонланувчи пулни осон йўл билан қўлга киритишни мақсад қилган.
Мазкур ҳолат юзасидан Ўзбекистон Республикаси Жиноят кодексининг 164-моддаси 4-қисми (босқинчилик) билан жиноят иши қўзғатилган.
