АҚШ расмийлари россиялик хакерлар ҳақида маълумот берганлик учун 10 миллион доллар миқдорида мукофот эълон қилди. Бу ҳақда кеча, 14 июль куни Америка Қўшма Штатлари Адлия вазирлиги сайтида хабар берилди.
Аниқлик киритилишича, ушбу мукофот Санкт-Петербургдан бўлган ва муҳим инфратузилма объектларига киберҳужумлар уюштиришда гумонланаётган уч нафар россиялик хакер ҳақидаги маълумот учун тўланади.
Вазирлик маълумотларига кўра, айбланувчиларга нисбатан компьютер соҳасидаги жиноятлар, интернет орқали фирибгарлик ва жиноий фаолиятдан олинган даромадларни легаллаштириш (пул ювиш) бўйича сиртдан айблов қўйилган.
Қайд этилишича, хакерлар томонидан фойдаланилган инфратузилма орқали АҚШдаги ўнлаб ташкилотларга, жумладан, банклар, мактаблар, шифохоналар, давлат идоралари ва медиакомпанияларга ҳужумлар уюштирилган. Кўрилган умумий зарар ўнлаб миллион долларни ташкил этмоқда.
