Россияда ўлатга қарши курашиш институти ходими вафот этганидан сўнг Иркутск вилоятидаги шифохоналарда карантин жорий этилди. Бу ҳақда “Люди Байкала” нашрига таяниб Deutsche Welle хабар берди.
Расмийлар марҳумада “касбий фаолияти билан боғлиқ микроорганизмлар аниқланмагани”ни айтмоқда. Шу билан бирга, 1, 3 ва 10-сонли шаҳар клиник шифохоналари, туғуруқхона ва Ивано-Матренинск болалар клиник шифохонаси карантинга ёпилган. Бундан ташқари, Шелехов шаҳридаги Иркутск алюминий заводида (ИркАЗ) ниқоб тақиш режими жорий этилган.
2 октябрга ўтар кечаси Иркутскда ўлатга қарши курашиш институти лабораторияси ходими, 28 ёшли Даря Шипилова вафот этди. Унинг ўлими сабаби расман эълон қилинмаган. “Роспотребнадзор” беморда “келиб чиқиши номаълум пневмония” бўлганини маълум қилган. Идора ходиманинг лавозими ва исмини очиқламаган, фақат унинг институтда ишлаганини билдирган. Қўшни Бурятия раҳбари Алексей Циденов эса унинг ўлимига ўлат сабаб бўлганини айтган.
Иркутск вилояти губернатори Игор Кобзев 2 октябрь куни Россиянинг бош давлат санитария врачи Анна Попова иштирокида вилоят санитария ва эпидемияга қарши комиссиясининг навбатдан ташқари йиғилиши ўтказилганини айтди. У бунга вилоят аҳолисидан бирида “ўта хавфли инфекция” аниқлангани эҳтимолини сабаб қилиб келтирган. Бироқ губернатор инфексияни келтириб чиқарувчи микроорганизм номини очиқламаган.
Кобзевнинг сўзларига кўра, эпидемияга қарши барча зарур чоралар кўрилмоқда. Яқин алоқада бўлгани аниқланган барча шахслар эса тиббий кузатувга олинган.
