Қирғизистонда собиқ ички ишлар ходими турмуш ўртоғини ўлдирганликда гумонланмоқда. У илгари Бишкек Йўл ҳаракати хавфсизлиги бошқармасида фаолият юритган У.Б. бўлиб, айни вақтда ҳибсга олинган. Бу ҳақда маҳаллий нашрлар ёзмоқда.
Жиноят кеча, 23 декабрь куни маҳаллий вақт билан соат 21:40 да пойтахтнинг Боконбаев ва Ибраимов кўчалари кесишмасидаги кўп қаватли уйда содир бўлган.
Фавқулодда вазиятлар хизматига ҳалокатли ҳодиса ҳақида қўнғироқ келиб тушган, шундан сўнг воқеа жойига тергов гуруҳи ва Свердловск туман Ички ишлар бошқармаси раҳбарияти юборилган.
Дастлабки маълумотларга кўра, 1978 йилда туғилган У.Ж. (аёл) ва 1977 йилда туғилган У.Б. (эркак) ўртасида жанжал келиб чиққан. Эркак аёлга олти марта ўқ узган. У ўқ жароҳатларидан воқеа жойида вафот этган.
Эътиборли жиҳати шундаки, оила ҳодиса содир бўлган кунда қонуний ажрашган бўлган, ажрим жараёнидан кейин аёл ва эркак ўртасида жанжал келиб чиққан. Шунингдек, ўша куни аёлнинг туғилган куни бўлиб, у 47 ёшни қаршилаган. Жуфтликнинг икки фарзанди бўлган.
Гумонланувчи У.Б. полиция ходимлари томонидан ҳибсга олинган ва Бишкек Ички ишлар бош бошқармасининг вақтинчалик сақлаш ҳибсхонасига жойлаштирилган. Жиноят содир этилган пайтда у маст бўлганлиги аниқланган. ОАВ ўз манбаларига таяниб хабар беришича, марҳум илгари полицияга оилавий зўравонлик ҳақида ариза берган.
Ушбу ҳодиса Қирғизистон Республикаси Жиноят кодексининг 122-моддаси (“Қотиллик”) бўйича рўйхатга олинган. Жиноят иши қўзғатилган. Тергов давом этмоқда.
