Қирғизистон парламентининг собиқ депутати Дуйшон Тўрақулов уюшган жиноий гуруҳда фаолият олиб борганликда гумон қилиниб қамоққа олинди. Бу ҳақда “24.kg” хабар берди.
Первомай туман суди маълумотига кўра, собиқ депутатни ҳибсга олиш ҳақидаги қарор 19 июнь куни қабул қилинган. Суд Ички ишлар вазирлиги терговчисининг илтимосномасини қаноатлантириб, собиқ депутатни 30 июнга қадар тергов ҳибсхонасига жойлаштирган.
Қайд этилишича, Дуйшон Тўрақулов Қирғизистон Жиноят кодексининг 261-моддаси 2-қисми (уюшган жиноий гуруҳда иштирок этиш) бўйича айбланмоқда. Мазкур модда беш йилдан саккиз йилгача озодликдан маҳрум қилиш ва мол-мулкни мусодара қилиш жазосини назарда тутади.
Айни пайтда, Қирғизистон Ички ишлар вазирлиги унинг қўлга олингани ҳақида расман хабар бермаган.
Шунингдек, маълум қилинишича, Дуйшон Тўрақулов “Душка” лақаби билан ҳам танилган. У VI чақириқ Жогорку Кенеш депутати бўлиб, “Бир Бол” сиёсий партиясидан парламентга сайланган.
Манбага кўра, собиқ депутат 2021 йилда Ўш шаҳридаги терини қайта ишлаш заводини рейдерлик (корхона, завод, компания ёки бошқа мулкни унинг қонуний эгасидан турли ноқонуний усуллар орқали тортиб олиш) йўли билан эгаллашда айбланиб қўлга олинган. Кейинчалик суд уни уй қамоғига чиқарган ва Тўрақулов парламентдаги фаолиятини давом эттирган.
Билдирилишича, мазкур иш бўйича тергов натижалари ва суднинг якуний қарори ҳақида расмий маълумот берилмаган.
