Бугун, 11 март куни Қирғизистон Миллий хавфсизлик давлат қўмитаси Бишкек шаҳрида Жогорку Кенешнинг собиқ депутати Қувончбек Конгантиевни ҳибсга олди. Бу ҳақда “24.kg” хабар берди.
Дастлабки маълумотларга кўра, Конгантиевга нисбатан тергов ҳаракатлари олиб борилмоқда. Ҳибсга олиш тафсилотлари ва унга қўйилиши мумкин бўлган айбловлар ҳозирча расман очиқланмаган.
Манбаларга кўра, у коррупция ва ноқонуний бойлик орттиришда гумон қилинмоқда. Бир кун олдин ижтимоий тармоқларда Конгантиев оиласининг активлари ҳамда унинг Қирғизистон Миллий хавфсизлик давлат қўмитасининг собиқ раҳбари Қамчибек Ташиев билан алоқалари ҳақида маълумотлар тарқалган эди.
Шунингдек, собиқ депутатга яқин бўлган айрим шахслар ҳам жиноий жавобгарликка тортилиши мумкинлиги айтилмоқда. Ҳозирча бу бўйича расмий изоҳ берилмаган.
Маълумот учун, сайловлар ва референдумлар бўйича Марказий комиссия Қувончбек Конгантиевнинг депутатлик ваколатларини муддатидан олдин тугатиш тўғрисидаги аризасини кўриб чиқиб, унинг мандатини бекор қилганди.
