Қирғизистон президенти Садир Жапаров 2,5 йилдан кейин мамлакат қишда ўзини электр энергияси билан тўлиқ таъминлай олишини айтди. Сиёсатчи Жалолобод вилоятидаги Қоракўл ГЭСнинг очилиш маросимида нутқ сўзлади.
Садир Жапаровнинг таъкидлашича, ГЭСнинг ишга туширилиши мамлакат энергетика хавфсизлигини таъминлаш ва миллий иқтисодиётни ривожлантиришда муҳим қадам ҳисобланади.
“Биз барқарор энергия таъминотини йўлга қўямиз ва қишки тақчилликни босқичма-босқич бартараф этамиз. Қирғизистон 2,5 йилдан сўнг электр энергиясини импорт қилишни тўхтатади. Мамлакатимизда ишлаб чиқарилган энергия ички эҳтиёжларни тўлиқ қоплайди”, дея таъкидлади у.
Президент ГЭС қурилиши режадан 5 ой олдин якунланганини қайд этди. Лойиҳа тўлиқ маҳаллий “Жагалмай” компанияси томонидан миллий ресурслар ҳисобидан амалга оширилди.
Жапаров, шунингдек, ҳозир Қирғизистон ҳудудида 40 га яқин кичик ва ўрта ГЭС, Қара-Кече шаҳрида эса янги иссиқлик электр стансияси қурилаётганини айтди.
“Табиий бойликларимиздан самарали фойдалана бошладик. Бугунги ишга тушириш мамлакатнинг энергетик мустақиллиги сари қўйилган ишончли қадамдир”, деди президент.
Қоракўл гидроэлектр стансияси Қорасув дарёсида қурилган бўлиб, замонавий ускуналар билан жиҳозланган. Объектдан 15 йил фойдаланилгандан сўнг, у давлат мулкига ўтказилади.
Қирғизистон 2024 йилда 3,6 миллиард кВт/соат электр энергиясини импорт қилди. Мамлакат Россия, Ўзбекистон, Қозоғистон ва Туркманистондан электр энергияси сотиб олади.
